Í gær, laugardaginn 6. september, var haldin uppskeruhátíð Sumarslestursins 2025. Markaði hún jafnframt vetraropnun Bókasafns Vestmannaeyja en fram í maí á næsta ári er opið alla laugardaga kl. 12-15.

Að þessu sinni opnaði safnið ekki fyrr en kl 13 vegna Vestmannaeyjahlaupsins og var því opið til kl. 16 þennan eina dag. Laugardagsopnanir hafa mælst afar vel fyrir og oft hefur verið fullt út úr dyrum enda starfsfólkið óþreytandi við að finna upp á einhverju skemmtilegu.

Þema sumarlesturins að þessu sinni var Nammilandið, enda fá börn (og líka fáir fullorðnir) sem ekki laðast að namminu! Nammilandshúsið á Bókasafninu er orðið víðfrægt og flest börn sem alast upp  í Vestmannaeyjum munu einhvern tíma muna eftir því að hafa skondrast í kringum húsið eða laumast inn í það til að leggjast niður og jafnvel lesa í rólegheitunum.

Á uppskeruhátíðina mættu að þessu sinni um 80 manns, góð mæting en oft hefur blaðamaður verið á staðnum þar sem allt hefur verið stappað með yfir 100 manns. Þau sem komu skemmtu sér hið besta því margt var í boði. Það voru alls kyns leikir í Einarsstofu, föndur inn á Bókasafninu og bingó. Auk þess var popp og glaðningur í boði fyrir börnin undir eftirliti starfsfólks og foreldra.

Fengu börnin stimpil  á hendina eins og á Þjóðhátíð þegar glaðningur hafði verið afhentur og var ekki hægt að ná honum af nema að fara í bað. Vetrardagskrá Bókasafns Vestmannaeyja hófst með þessari dagskrá.

Litlu áður hafði forstöðumaður safnsins, Kári Bjarnason, farið í sína árlegu heimsókn í Hamarsskóla ásamt Drífu Arnardóttur, og afhent þar hverju einasta barni sem var að hefja skólagöngu sitt eigið bókasafnsskírteini.

Þessum árlega viðburði er síðan fylgt litlu síðar eftir með heimsókn á safnið í samstarfi við umsjónarkennara barnanna og markar upphaf af sterku sambandi bókasafns og skóla.

Það er því margt sem Bókasafn Vestmannaeyja gerir til að laða öll börn að bókinni og sannarlega ástæða til að hvetja foreldra að vera dugleg að mæta með börnin sín á safnið. Það er öruggt að starfsfólkið tekur vel á móti barninu þínu.