Krónan mun standa fyrir söfnun fyrir stuðnings- og ráðgjafasetrið Bergið Headspace í verslunum sínum um allt land á morgun og á fimmtudaginn, dagana 28. og 29. maí. Þá býðst viðskiptavinum að gefa 500 krónur eða meira á sjálfsafgreiðslukössum og í Skannað og skundað í lokaskrefi afgreiðslu. Upphæðin rennur óskert til Bergsins sem veitir ungmennum á aldrinum 12 til 25 ára fría ráðgjöf og aðstoð með það að markmiði að bæta líðan og auka virkni þeirra í samfélaginu.

Líðan ungmenna hefur versnað til muna

Eva Rós Ólafsdóttir, framkvæmdastjóri Bergsins Headspace segir að ungt fólk hér á landi standi frammi fyrir fjölbreyttum áskorunum í nútíma samfélagi og því sé mikilvægt að styðja við þau til að átta sig á og takast á við eigin tilfinningar, hegðun og viðbrögð. Sama sé upp á teningnum hjá nágrannaþjóðum okkar og þurfi að grípa þessi ungmenni snemma á meðan vandinn sé enn yfirstíganlegur.

„Við þökkum Krónunni kærlega fyrir að standa að þessari söfnun og þeim viðskiptavinum sem kjósa að styrkja það mikilvæga starf sem fer fram í Berginu Headspace. Rannsóknir og kannanir sýna að líðan ungmenna á Íslandi hefur versnað til muna á síðustu árum. Því til stuðnings lýsa 44% grunnskólabarna depurð og 56% lýsa kvíða í Íslensku æskulýðsrannsókninni sem fram fór árið 2024 og hefur því sjaldan verið jafn mikil þörf á úrræðum, fjármagni og sérfræðiþekkingu inn í þennan veigamikla málaflokk,“ segir Eva Rós.

Tilkomið vegna áskorunar frá Lyfju

Guðrún Aðalsteinsdóttir, framkvæmdastjóri Krónunnar segir að söfnunin hafi komið til vegna áskorunar frá Lyfju sem tóku þátt í svokallaðri „ísfötuáskorun“ sem er í gangi á TikTok þessa dagana. Henni sé ætlað að vekja athygli á andlegri heilsu.

„Að sjálfsögðu tókum við hjá Krónunni áskoruninni en okkur langaði þó að gera meira. Við hugsuðum strax til Bergsins Headspace enda hafa þau unnið ötullega að því að styðja ungmenni í átt að betri líðan. Ráðgjöf og stuðningur við ungmenni hefur sjaldan verið jafn mikilvægur og nú, og við viljum leggja okkar af mörkum. Með sameiginlegu átaki nýtum við tæknilausnir Krónunnar til að gera viðskiptavinum kleift að styðja við Bergið og vonum að sem flestir taki þátt í þessu mikilvæga verkefni sem hefst í öllum verslunum okkar á morgun og stendur yfir í tvo daga,“ segir Guðrún.

Krónan tók áskorun Lyfju og fengu nokkrir forstöðumenn fyrirtækisins gusu yfir sig á dögunum til að vekja athygli á átakinu. Krónan sendir sömu áskorun á ELKO og hægt er að sjá myndband af uppátækinu hér.

Um Bergið Headspace

Bergið Headspace hefur frá árinu 2019 veitt ungmennum á aldrinum 12 til 25 ára ókeypis ráðgjöf án tilvísunar. Um er að ræða svokallaða lágþröskuldaþjónustu þar sem stuðningur, ráðgjöf og fræðsla er veitt á forsendum unga fólksins. Ráðgjöfin nær til málefna eins og geðheilsu, náms, sjálfsmyndar og félagslegra tengsla. Í Berginu er lagt upp með að skapa notalegt og öruggt umhverfi fyrir ungt fólk sem óskar eftir aðstoð fagfólks og notenda með fjölbreytta reynslu. Hjá Berginu starfa sérfræðimenntaðir ráðgjafar sem veita ungu fólki stuðning og fræðslu og aðstoða með leiðir til að vinna úr vandamálum þeirra. Bergið er staðsett í Reykjavík, Hafnarfirði, Kópavogi, Mosfellsbæ og á Akureyri.