Safnahelgin er fram undan og menningarlífið í Eyjum fer á fullt þegar söfn, gallerí og menningarhús bæjarins sameinast í fjölbreyttri og líflegri dagskrá. Gestir geta notið ljósmyndasýninga, tónleika, bókakynninga og fræðandi erinda, auk þess sem opnar vinnustofur og sýningar bjóða upp á einstaka innsýn í list og sögu Eyjanna.

Safnahelgin er orðin fastur liður í menningarlífi Vestmannaeyja og hefur ávallt að geyma eitthvað fyrir alla aldurshópa – hvort sem þú ert heimamaður eða gestur í heimsókn. Hér að neðan má sjá dagskrá helgarinnar í heild.

SAFNAHELGIN Í VESTMANNAEYJUM 30. október – 2. nóvember 2025.

Fimmtudagur 30. október

 13:30 Safnahús: Ljósmyndadagur.

Elstu myndir af Vestmannaeyjum, frá 19. öld og nýlega afhend mannamyndasöfn frá 20. öld dregin fram.

17:00 Opnun á ljósmyndasýningu Óskars Péturs.

Fáir eru þeir viðburðirnir í Vestmannaeyjum á síðustu árum og áratugum sem Óskar Pétur hefur ekki fest á filmu. Úrval mynda hans hefur nú verið gefið út í upplagðri gjafabók, Westman Islands. Myndirnar á sýningunni eru úr bókinni sem verður til sölu á staðnum.

18:00 Stafkirkja: Setning.

Sr. Guðmundur Örn Jónsson og Kristín Jóhannsdóttir. Tónlistaratriði flytja Júlíanna S. Andersen og Kitty Kovács.

20:00 Höllin: Ég skal syngja fyrir þig.

Einar Ágúst færir okkur margar af þekktustu perlum Íslandssögunnar er hann syngur ljóð Jónasar Friðriks við undirleik Gosanna.

Föstudagur 31. október

18:00-20:00 Bókasafn: Grikk eða gott.

Í tilefni af Hrekkjavöku verður Bókasafnið opið til kl. 20:00 og boðið upp á  Grikk eða gott. Bókasafnið er skreytt í tilefni Hrekkjavökunnar og tilvalið að koma og skoða herlegheitin.

20:30 Eldheimar:  Pálmi og Stefanía.

Pálmi Sigurhjartarson píanóleikari og Stefanía Svavarsdóttir söngkona hafa á undanförnum árum sem dúó leikið og sungið sig inn í hjörtu þjóðarinnar með  þekkingu sinni og túlkun í hæsta gæðaflokki. Nú mæta þau í fyrsta sinn saman sem dúó  í Eldheima og taka margar af ástsælustu perlum tónlistarsögunnar.

Laugardagurinn 1. nóvember

11:00 Bókasafn: Embla Backmann.

Embla er orðin einn  ástsælasti barnabókahöfundur landsins þrátt fyrir ungan aldur. Fyrsta bókin hennar, Stelpur stranglega bannaðar, sló rækilega í gegn og nú er hún mætt með Paradísareyjuna, spennusögu um dularfulla eyju og enn dularfyllri íbúa hennar og dónalega gesti. Bókin verður til sölu á staðnum.

Kl. 14:00 Sagnheimar: Konunglegt teboð.

Guðný Ósk Laxdal heldur erindi um dönsku konungsfjölskylduna en Guðný Ósk heldur úti vinsæla Instagram reikningnum Royal Icelander þar sem hún deilir alls konar fréttum og fróðleik úr heimi kóngafólksins.

Sunnudaginn 2. nóvember

Kl. 13:00 Sagnheimar: Bókakynning.

Að þessu sinni koma tvær konur og kynnar bækur sínar. Önnur er knattspyrnudrottningin  Margrét Lára Viðarsdóttir með knattspyrnuævisögu sína, Ástríða fyrir leiknum. Hin er Eliza Reid, fyrrverandi forsetafrú og nú slunginn spennusagnahöfundur, sem bregður upp listilegri fléttu af afleiðingum þess að verða veðurtepptur í Vestmannaeyjum. Báðar bækurnar verða til sölu á staðnum.

Aðrir viðburðir og opnunartímar:

Hvíta húsið við Strandveg.: Lista- og menningarfélagið verður með opið hús og opnar vinnustofur föstudag – sunnudags 13:00-16:00.

Eldheimar: Opið daglega kl. 13 :30– 16 :30.

Bókasafnið: Opið fimmtudag kl. 10-17, föstudag kl. 10-20 og laugardag kl. 12-15.

Einarsstofa: Opið daglega kl. 10-17.

Fágætissalur Safnahúss: Opið fimmtudag og föstudag kl. 13-17. Verið velkomin á varanlega sýningu á málverkum Jóhannesar S. Kjarvals og Júlíönu Sveinsdóttur. Margar af fágætustu bókum landsins eru einnig til sýnis á þessum einstaka stað.

Sagnheimar: Opið laugardag kl. 12:00-15:00.