Ýmsar kannanir benda til að Vinstrihreyfingin- grænt framboð sé á mörkum þess að ná þingmanni í Alþingiskosningunum á laugardaginn. Það væri að mínu mati afar skaðlegt fyrir íslenskt samfélag ef hreyfingin fengi engan fulltrúa og talsmenn á Alþingi. Því skora ég á kjósendur að velta vel fyrir sér fyrir hvað Vinstrihreyfingin- grænt framboð stendur og hverja samleið hún á með almenningi í þessu landi. Hér nefni ég nokkur dæmi þar sem stefna hreyfingarinnar kemur fram, stefna sem hefur sérstöðu miðað við stefnu annarra stjórnmálaafla.

• Hreyfingin leggur áherslu á jafnræði, manngæsku og félagslegt réttlæti.
• Hreyfingin leggur áherslu á réttlátt skattkerfi þar sem hálauna- og stóreignafólk greiðir hærra hlutfall til samfélagsins en þeir sem hafa lægri laun.
• Hreyfingin leggur áherslu á öflugt velferðarkerfi þar sem ýmis samfélagsleg þjónusta er í höndum hins opinbera en ekki í höndum einkaaðila sem hugsa fyrst og fremst um að græða á þjónustu við almenning.
• Hreyfingin leggur sérstaka áherslu á að heilbrigðisþjónustan skuli fjármögnuð með skattfé og á opinberum grunni. Einkarekstur í ágóðaskyni á ekki heima í heilbrigðisþjónustu.
• Hreyfingin leggur áherslu á að húsnæðismál taki mið af því að íbúðir eru fyrir fólk en lúti ekki lögmálum gróða- og markaðsvæðingar.
• Hreyfingin leggur áherslu á að innviðir samfélagsins verði ekki einkavæddir.
• Hreyfingin leggur áherslu á kynrænt sjálfræði.
• Hreyfingin leggur áherslu á að réttindi öryrkja og aldraðra þurfi enn að efla.

Hér hef ég nefnt örfá áherslumál Vinstrihreyfingarinnar- græns framboðs, mál sem sýna sérstöðu hennar miðað við önnur stjórnmálaöfl í landinu. En málin eru fleiri. Öll eiga þau fullt og nauðsynlegt erindi við flest okkar og þess vegna er nauðsynlegt að við tryggjum að hreyfingin eigi fulltrúa og talsmenn á Alþingi til þess tala máli venjulegs fólks. Það gerum við með því að setja X við V á laugardaginn.

Ragnar Óskarsson