Eins og áður hefur komið fram í fréttum urðu Sigurjón Þorkelsson og Auðunn Haraldsson jafnir og efstir á Skákþingi Vestmannaeyja 2026.

Tefldu þeir til úrslita í þriggja skáka einvígi sem fram fór í Skákheimili TV við Heiðarveg í dag. Tímamörk voru 15 mínútur á hvorn keppanda og 5 sekúndur til viðbótar á hvern leik. Hver skák tók um 30 mínútur.

Úrslit urðu þau að Sigurjón tryggði sér sigurinn með tveimur vinningum og þurfti því ekki að tefla þriðju skákina. Sigurjón Þorkelsson er margreyndur og er þetta í átjánda skipti sem hann verður skákmeistari Vestmannaeyja á síðustu 40 árum. Auðunn er aftur á móti að tefla í annað sinn á Skákþingi Vestmannaeyja og er árangur hans því mjög góður.

Hraðskákmeistaramót Vestmannaeyja á skírdag

Hraðskákmeistaramót Vestmannaeyja 2026 fer fram á skírdag, fimmtudaginn 2. apríl kl. 13:00 í Skákheimili TV við Heiðarveg. Tímamörk í hraðskákinni eru 5 mínútur á keppanda í hverri skák og 5 sekúndur á leik. Hver umferð tekur um 10–12 mínútur.

Reikna má með að mótið taki 2,5–3 klukkustundir og ljúki um kl. 16:00 á skírdag. Skákáhugamenn eru hvattir til að mæta, segir í tilkynningu frá TV.