Kvennalið ÍBV í handbolta tapaði gegn val á útivelli í lokaleik Olís deildar kvenna í dag. Leiknum lauk með 30-28 sigri Valskvenna.

Valskonur byrjuðu leikinn betur og voru 6-3 yfir eftir tíu mínútur. Eyjakonur komu til baka og var staðan jöfn, 10-10, eftir 20 mínútna leik. Valskonur náðu aftur upp forystu sinni og leiddu í hálfleik 17-12.

Valskonur voru áfram með yfirhöndina í síðari hálfleik og leiddu með fjórum mörkum, 20-16, þegar tíu mínútur voru liðnar. Eyjakonur stigu heldur betur upp og jöfnuðu leikinn í 22-22 þegar stundarfjórðungur var til leiksloka. Lokamínútur leiksins voru jafnar en Valskonur voru sterkari á lokametrunum og unnu að lokum tveggja marka sigur. Lokatölur leiksins 30-28.

ÍBV lýkur keppni í öðru sæti Olís deildarinnar með 32 stig. Valskonur urðu deildarmeistarar með 38 stig og fór bikarinn á loft í leikslok. 

Sandra Erlingsdóttir átti stórleik í liði ÍBV og var markahæst með 12 mörk. Amalia Frøland átti einnig mjög góðan leik í liði ÍBV og varði 13 skot. 

Mörk ÍBV: Sandra Erlingsdóttir 12 mörk, Birna Berg Haraldsdóttir 3, Klara Káradóttir 3, Alexandra Ósk Viktorsdóttir 2, Ásta Björt Júlíusdóttir 2, Birna María Unnarsdóttir 2, Amelía Dís Einarsdóttir 2, Ásdís Halla Hjarðar 1, Britney Emilie Florianna Clots 1, Lilja Kristín Svansdóttir 1. 

Bæði þessi lið eru búin að tryggja sig í undanúrslit úrslitakeppninnar en liðin í 1. og 2. sæti deildarinnar sitja hjá í fyrstu umferðinni. Undanúrslitin fara fram um miðjan apríl.