Útflutningsverðmæti sjávarafurða nam rúmlega 30 milljörðum króna í febrúar. Það er um 13% aukning í krónum talið frá sama mánuði í fyrra. Þar sem gengi krónunnar var að jafnaði um 4% sterkara nú í febrúar en fyrir ári, er aukningin nokkuð meiri í erlendri mynt, eða um 18%. Þetta má greina í fyrstu bráðabirgðatölum Hagstofunnar um vöruskipti í febrúar, en þar eru verðmætin einungis birt niður á grófa vinnsluflokka, ekki fisktegundir. Þetta kemur fram í tilkynningu frá SFS.

Þar segir jafnframt að aukninguna í febrúar megi rekja til nokkurra vinnsluflokka. Mikil aukning var í útflutningsverðmæti heilfrysts fisks, eða sem nemur um 64% milli ára á föstu gengi. Telja má nokkuð víst að þá aukningu megi að stærstum hluta rekja til loðnu. Þá var einnig talsverð aukning í ferskum afurðum (22%), frystum flökum (20%), söltuðum og þurrkuðum afurðum (14%) og fiskimjöli (41%). Á móti var samdráttur í útflutningsverðmæti lýsis (40%) og annarra sjávarafurða (16%).

Um 7% aukning frá áramótum

Útflutningsverðmæti sjávarafurða er komið í tæpa 58 milljarða króna á fyrstu tveimur mánuðum ársins. Það er um 7% aukning á föstu gengi frá sama tímabili í fyrra. Þar munar mest um aukningu í útflutningsverðmæti frystra flaka (13%) og ferskra afurða (12%). Einnig hefur orðið veruleg aukning í fiskimjöli (41%) og heilfrystum fiski (21%). Á móti vegur samdráttur í öðrum vinnsluflokkum, þar á meðal lýsi (16%) og söltuðum og þurrkuðum afurðum (3%).

Af þessum tölum má ráða að ágætur gangur hafi verið í útflutningi sjávarafurða í upphafi árs. Athyglisvert verður að fylgjast með þróuninni á næstu mánuðum, en afrakstur loðnuvertíðarinnar, sem nú er senn á enda, mun án efa setja sinn svip á útflutningstölurnar. Þetta á ekki síst við í ljósi þess að vertíðin í fyrra var afar takmörkuð og árið þar á undan var loðnubrestur.