„Við erum eingöngu á makrílveiðum þessar vikurnar. Það hefur gengið frekar hægt að ná makrílnum og margir dagar farið í að sigla og leita á stóru hafssvæði,“ sagði Eyþór Harðarson, útgerðarstjóri Ísfélagsins. „Álsey kom til Þórshafnar í gærkvöldi með 1000 tonn sem Ísfélagsskipin fiskuðu í síðustu daga.

Við erum búnir að fiska 13.000 tonn á þessari vertíð af um 18.000 tonna kvóta félagsins. Þannig að við þurfum að veiða alla vega eina umferð á skipin áður en líður að miðjum September. Það er tíminn sem skipin hafa haft til þessara veiða.“

„Huginn er á landleið með um 1.000 tonn af makríl sem fékkst í Íslenskri lögsögu,“ sagði Sindri Viðarsson, sviðsstjóri uppsjávarsviðs Vinnslustöðvarinnar. „Það hefur verið frekar rólegt á miðunum undanfarna daga en það kom svolítið skot í þetta núna um helgina.“

Flotinn er að veiðum djúpt norðaustur af landinu. Vinnslustöðin er með fjögur skip, Gullberg, Ísleif, Huginn og Kap. Hjá Ísfélaginu eru það Álsey, Sigurður, Heimaey og Suðurey sem fiska makrílinn. Öll veiða skipin í eitt skip sem fer í land þegar tilsettum afla er náð og svo koll af kolli.