„Spennistöðin er tengd. Það gleður okkur að tilkynna að núna er Viðlagafjara tengd raforkukerfi landsins.“ segir í facebook-færslu á síðu Laxeyjar í dag. Þar segir ennfremur:

„Hallgrímur Steinsson fékk heiðurinn að gangsetja spennistöðina sem er hönnuð með tilliti til rekstraröryggis í langtímarekstri.

Með því að tengjast raforkukerfi landsins tryggjum við öruggan rekstur með lágmarks áhrif á umhverfið. Laxey hefur nú þegar gert langtímasamning við Landsvirkjun um kaup á endurnýjanlegri raforku fyrir framleiðsluna.

Rafmagn er lykilþáttur fyrir landeldi og sér til þess að Laxey geti tryggt laxinum bestu vaxtarskilyrðin með dælingu og endurnýtingu á jarðsjó. Til að tryggja ótruflaða framleiðslu munu einnig vera vararafstöðvar á svæðinu sem eru nú þegar komnar á svæðið.
Það eru sex mánuðir þangað til að fyrsti skammtur verður færður yfir í landeldið í Viðlagafjöru. Gangsetning spennistöðvarinnar var því merkilegur áfangi í stórri framkvæmd sem er á áætlun.“