Íslandsmót skákfélaga í atskák fór fram í félagsheimili Taflfélags Reykjavíkur við Faxafen dagana 24.–25. nóvember. Alls tóku 12 sex-manna sveitir þátt í mótinu, frá átta skákfélögum, og sendu sum félög fleiri en eina sveit til keppni.

Tímamörk skákanna voru 10 mínútur á mann auk fimm sekúndna viðbótar fyrir hvern leik. Tefldar voru níu umferðir eftir Monrad-kerfi og stóð hver umferð í um það bil 35 mínútur.

Úrslit mótsins

Sigurvegari mótsins var A-sveit Breiðabliks, með stórmeistarann Vigni Vatnar Stefánsson á 1. borði. Sveitin vann allar sínar viðureignir og hlaut samtals 43,5 vinninga.

Í öðru sæti hafnaði A-sveit Taflfélags Reykjavíkur, sem vann átta af níu umferðum og fékk 40,5 vinninga. A-sveit Fjölnis endaði í þriðja sæti með sex sigra, eitt jafntefli og 38 vinninga.

Góð frammistaða hjá sveit TV

Sveit TV hafnaði í fjórða sæti með 12 stig — sex sigra og þrjú töp — og fékk alls 39 vinninga. Liðið stefndi hærra, en baráttan á toppnum var mjög hörð. Ungir og efnilegir hraðskákmenn efstu sveitanna skiluðu sínu vel, sem reyndist sterkustu liðunum í hag.

Sveit TV var skipuð nokkrum keppendum félagsins úr úrvalsdeild TV, auk þess sem Ægir Páll Friðbertsson og fleiri sterkir skákmenn bættust í hópinn.

Tvennir feðgar í liðinu

Í liðinu eru tvennir feðgar: Þorsteinn Þorsteinsson, liðstjóri úrvalsdeildar TV, og sonur hans Aron Ellert Þorsteinsson. Þá var Örn Leó Jóhannsson og faðir hans Jóhann Ingvarsson. Þeir hafa allir verið félagar í Taflfélagi Vestmannaeyja um árabil.

Á 1. borði fyrir TV tefldi stórmeistarinn Jóhann Hjartarson, sem stóð sig með stakri prýði líkt og aðrir liðsmenn. Liðið var mjög nálægt því að ná þriðja sætinu og vantaði ekki nema herslumuninn til að komast á verðlaunapall, segir í tilkynningu frá TV.