Fyrirtæki í uppsjávariðnaðinum hafa ákveðið að styrkja síldarverkefni, sem Hafrannsóknastofnun tekur þátt í, um rúmlega 4,3 milljónir.

Í tilkynningu frá SFS segir að verkefnið sé framhald á samnorrænu rannsóknaverkefni á stofnerfðafræði síldar í Noregshafi og hafsvæðunum í kring og aðgreiningu þeirra með erfðafræðilegum aðferðum. Afli síldar fyrir austan Ísland og í Noregshafi er gjarnan blanda af fleirum en einum stofni og umfangið verið meira tvö síðustu sumur og haust en áður. Það hefur skapað miklar áskoranir og óvissu.

Íslenska sumargotssíld má greina frá norsk-íslenskri vorgotssíld út frá kynþroskastigi en hversu austarlega nær sú íslenska og hvaða síld er blönduð við norsk-íslenska síld austar? Þessari spurningu hefur verið reynt að svara með fyrri verkefnum sem byggja á erfðafræðilegum rannsóknum en greingarhæfni vantar til að aðgreina sumar- og haustgotssíldarstofna á þessu svæði.

Markmið þessa verkefnis Hafrannsóknastofnunar er að kortleggja erfðamengi íslenskrar sumargotssíldar (e.whole genome sequencing), en það sama verður einnig gert við hausthrygnandi síldarstofna við Noreg og Færeyjar af þarlendum stofnunum til samanburðar. Þarlendir aðilar munu kosta þær rannsóknir.

Með greiningum á öllu erfðamengi þessara stofna má þróa erfðamörk sem hægt er að nota til að aðgreina þá, sem er lokamarkmið þessa verkefnis. Afurð verkefnisins og nýnæmi verður því erfðamörk sem hægt er að nota til að aðgreina íslenska sumargotssíld frá öðrum síldarstofnum í afla og við stofnmælingar, en hvoru tveggja hefur verið að ábótavant undanfarin ár.