Vestmannaeyjabær auglýsti í dag eftir einstaklingum til að sinna daggæslu barna, eða svokölluðum dagforeldrum. Sem stendur er enginn starfandi dagforeldri í Vestmannaeyjum, en fram til þessa hafa flest börn fengið leikskólapláss um eins árs aldur. Nú virðist hins vegar þörf á fleiri úrræðum fyrir yngstu börnin.

Í auglýsingunni kemur fram að Vestmannaeyjabær veiti dagforeldrum starfsleyfi og sinni ráðgjöf og eftirliti með starfseminni. Dagforeldrar starfa með eigin gjaldskrá en sveitarfélagið mun greiða niður daggæslu samkvæmt ákveðnum reglum. Einnig verður veittur stuðningur við að koma upp aðstöðu ef þörf krefur, í samræmi við reglur sveitarfélagsins.