- Eyjafréttir
- ·
- Almennt
- ·
„Við höfum verið gleymda fangelsið. Það að Árni skuli hafa munað eftir okkur gerir hann að vinsælasta manninum hér,“ varð einum fanganum í Kvennafangelsinu
í Kópavogi að orði í gær þegar Árni Johnsen mætti með flutningabíl fullan af nýjum springdýnum fyrir fangana.
Tildrög gjafarinnar eru þau að daginn eftir að Árni færði Hegningarhúsinu við Skólavörðustíg sjónvörp í haust fékk hann símtal frá kvenfanga í Kópavogi. Sagði hún rúmin þar jafngömul fangelsinu, sem og svampdýnurnar sem væru orðnar morknar. Árni gekk í málið, fékk nokkur félög og einkaaðila til að styrkja málefnið og keypti síðan tólf vönduð rúm frá RB rúmum í Hafnarfirði með afslætti. „Þetta er eins og gerist á bestu hótelum borginnar,“ sagði Árni stoltur þegar hann gekk inn með fyrstu dýnuna úr flutningabílnum.
Einar Andrésson, varðstjóri í Kvennafangelsinu, segir að beðið hafi verið um ný rúm árum saman enda afar mikilvægt að fólk geti fengið góða hvíld. „Það er nú bara þannig að fangelsi eru alltaf látin sitja á hakanum,” sagði hann og bætti við: „Ég held að þetta verði til þess að mikið dragi úr bakvandamálum og lyfjanotkun vegna verkja.” „Æi, ég gleymdi að ryksuga gólfið fyrir nýja rúmið,” hrökk upp úr einni konunni þegar þær fylgdust með því þegar nýju rúmin voru borin inn í herbergin og því greinilegt að þeim þótti mikið til gjafarinnar koma.
