Á fundi bæjarstjórnar Vestmannaeyja sl. fimmtudag skapaðist mikil umræða meðal bæjarfulltrúa þegar liður sem varðaði umsóknir í leikskóla og stöðu inntökumála lá fyrir.

Fram kemur í fundargerð að bæjarfulltrúar Sjálfstæðisflokksins lögðu fram tillögu um að fallið yrði frá áformum um tvöföldun heimgreiðslna til forráðamanna barna sem ekki eru í leikskóla frá 12-16 mánaða aldri.

Fundarhlé var tekið eftir að tillaga þessi var borin upp og að því loknu gáfu bæjarfulltrúar E og H lista frávísunartillögu „í ljósi þess að fræðsluráð hefur vísað málinu til afgreiðslu í bæjarráði og sú umfjöllun ekki farið fram”.

Tillagan var samþykkt með fimm atkvæðum bæjarfulltrúa E og H lista gegn fjórum atkvæðum fulltrúa D lista.

Bæjarfulltrúar D lista lögðu því fram eftirfarandi bókun:

„Undirrituð taka undir bókun fulltrúa Sjálfstæðisflokksins í Fræðsluráði og telja þetta ótímabært skref. Ekki síst í ljósi þess að nýlega bókaði bæjarráð um mikilvægi aðhalds og hagræðingar í rekstri. Orð um slíkt eru óþörf ætli meirihlutinn ekki að standa við þau. Þessi liður stefnir í að keyra talsvert fram úr fjárhagsáætlun þessa árs og mun með tvöföldun á framlagi vegna heimgreiðslna verða amk 24 milljónir á næsta ári skv. minnisblaði.

Ákvörðun hækkunarinnar er ekki í neinu samræmi við upphæðir heimgreiðslna annarra sveitarfélaga auk þess sem ekkert ákall hefur verið um þessa breytingu frá samfélaginu.

Undirrituð vita að samvera foreldra og barna á fyrstu árum er afar mikilvæg, en við brotthvarf starfsemi dagforeldra í Vestmannaeyjum hefur þörf á leikskólaplássum fyrir yngri börn aukist. Þörf er á heildarendurskoðun á málaflokknum, bæði af hálfu ríkisins hvað varðar lengd fæðingarorlofs, en einnig af hálfu sveitarfélaga t.d. hvað varðar vistunartíma og gjaldskrá barna í leikskóla.”

Þeirri bókun svöruðu bæjarfulltrúar E og H lista:

„Hækkun heimgreiðslna er aðgerð til þess að tryggja úrræði fyrir börn og foreldra að loknu fæðingarorlofi. Tölulegar upplýsingar liggja fyrir um aukna þörf á nýjum leikskólaplássum á næstu tveimur árum. Hækkun heimgreiðslna er tímabundin aðgerð í eitt ár og er liður í að koma til móts við foreldra og um leið að kanna hvort greiðslurnar stuðli að ákveðnu jafnvægi þegar kemur að eftirspurn eftir leikskólaplássum. Það er mikilvægt að heimgreiðslur séu raunverulegt val fyrir foreldra sem hafa þess kost að vera lengur heima með ungum börnum sínum. Það er fjárhagslega hagkvæmt fyrir sveitarfélagið að fara blandaða leið, þ.e. með heimgreiðslum og fjölgun leikskólaplássa. Verið er að fylgja eftir því sem fram kom í bæjarráði í júní sl. en jafnframt verið að huga að því hlutverki að veita sem besta þjónustu. Eðlilegt er að bæjarráð fjalli um málið áður en bæjarstjórn tekur það fyrir.”

Að lokum lagði Hildur Sólveig Sigurðardóttir, bæjarfulltrúi D lista, fram eftirfarandi bókun: