Magnús Kjartan Eyjólfsson, söngvari og gítarleikari Stuðlabandsins frá Selfossi, mun leiða brekkusönginn í þriðja sinn í kvöld. Í fyrsta skiptið hafi það þó verið fyrir tómri brekkunni og söngnum streymt heim til fólks þar sem Þjóðhátíð var blásin af vegna Covid-19.

„Þetta leggst mjög vel í mig og ég er farinn að hlakka mikið til. Í fyrra var ég náttúrulega að stjórna brekkusöng í fyrsta skiptið með fólk í brekkunni og ég er alveg jafn spenntur núna” segir Magnús Kjartan í samtali við Eyjafréttir.

Gestrisnin og blysin heilla

Frá 16 ára aldri hefur Magnús mætt á Þjóðhátíð með aðeins örfáum hléum. Gestrisni heimamanna og blysin á sunnudeginum er það tvennt sem hefur heillað mest. „Það er einhver sérstök tilfinning sem er ekki hægt að lýsa þegar maður sér blysin í brekkunni. Það er alveg ótrúleg upplifun.”

Spenntastur segist hann fyrir því að fá að upplifa Þjóðhátíð með allri fjölskyldunni. „Í þetta skiptið eru ég og konan með allar dæturnar fjórar með okkur. Ég hlakka mikið til að fá að upplifa það.”

Náttúruleg stúka á heimsmælikvarða

„Ég hef alltaf litið á það að þegar maður er að stjórna brekkusöng þá er maður bara einn af fólkinu. Þetta er líka einhver svakalegasta sviðsmynd sem hægt er að fá á Íslandi, að vera með þessa náttúrulegu stúku á heimsmælikvarða fyrir framan sig. Þú berð þetta ekki saman við neitt annað.”

Ásamt því að stjórna brekkusöng kemur Magnús fram með Stuðlabandinu seinna um kvöldið. Hann segir gesti mega búast við miklu fjöri, mikilli spilagleði og góðri tónlist frá þeim vinum. Áður hafa þeir tekið finnska Eurovision lagið „Cha cha cha” frá í ár og segist Magnús eiginlega getað lofað því að þeir eigi eftir að gera það í kvöld.

Aðspurður hvernig það hafi verið að ná að læra textann, þar sem lagið er alfarið sungið á finnsku, segir Magnús það hafa verið algjöran páfagaukalærdóm en að það hafi tekist að lokum. 

„Finnskan hefur það svona fram yfir önnur tungumál að hún er skrifuð eins og hún er sögð þannig að það var frekar auðvelt að læra textann hvað það varðar. Hinsvegar þá veit ég ekkert hvað ég er að syngja um og er bara að læra hljóðin og þá er maður auðvitað bara svolítið eins og páfagaukur.”

Látum okkur annað fólk varða

„Ég hlakka til að sjá ykkur og svo vil ég minna á að við skulum vera vakandi og láta okkur annað fólk varða um helgina. Þannig getum við öll skemmt okkur sem best” segir Magnús að endingu.