ÍBV var nokkrar mínútur að komast í gang í leiknum gegn Víkingum í Olísdeild karla í Vestmannaeyjum í gær. Á sjöttu mínútu var staðan 2:2 en þá tóku Eyjamenn öll völd á vellinum. Í hálfleik var staðan 19:10 og lokatölur 40:22. Má segja að ÍBV hafi þar með náð að hefna fyrir tapið gegn Víkingum í haust.

En taka verður ofan fyrir Víkingum sem komu með Herjólfi frá Þorlákshöfn til Eyja í skítabrælu. Fengu leiknum flýtt, leikhlé var tíu mínútur og beint í Herjólf að leik loknum. Víkingar sem standa undir nafni.

Eyjamenn undir stjórn Magnúsar Stefánssonar eru á góðri siglingu og sitja í öðru sæti með 19 stig eftir 13 umferðir. Langt frí er framundan og fer deildin ekki af stað fyrr en í byrjun febrúar. Dánjal Ragnarsson, frá Færeyjum lék sinn síðasta leik með ÍBV í gær en hann skoraði þrjú mörk. Var hann kvaddur með virktum.

„Mér líst vel á þetta, við stefn­um alltaf á þá titla sem eru í boði. Liðið er á góðum stað, það er stemn­ing í hópn­um og í bæj­ar­fé­lag­inu, góð mæt­ing á leiki og það er allt til alls. Það er svo alltaf spurn­ing hvernig við náum að láta þetta smella sam­an, við mun­um sakna Dánjals eft­ir ára­mót, hann gef­ur okk­ur ákveðna breidd og mögu­leika sem við miss­um af.

Við erum samt með unga stráka í U-liðinu og 3. flokki sem bíða eft­ir tæki­fær­inu,“ sagði Magnús í samtali við mbl.is eftir leikinn.

Mynd Sigfús Gunnar:

Sigri fagnað.