VR eykur kraftinn í Eyjum
Halla Gunnarsdóttir skrifar
Vr Halla Gunnars Net 3
Halla Gunnarsdóttir, formaður VR. Aðsend mynd

Þegar félagsfólk Verslunarmannafélags Vestmannaeyja tók þá ákvörðun að sameinast VR snemma á þessari öld var það eitt af skilyrðum sameiningarinnar að áfram yrði rekin skrifstofa á staðnum. Félagið leggur nú áherslu á að efla enn frekar þjónustuna og auðvelda félagsfólki að leita aðstoðar og upplýsinga þegar þörf krefur. Þess vegna auglýsti VR nýverið nýja stöðu starfskrafts í Eyjum og þegar þetta er ritað stendur yfir erfitt val milli afar öflugra umsækjenda.

Meiri þjónusta, ekki minni

Staðbundin þjónusta hefur átt undir högg að sækja undanfarin ár og áratugi, jafnt hjá fyrirtækjum sem hinu opinbera. Landsbyggðarfólk þekkir það vel að þurfa að fara um sífellt lengri veg til að sækja mikilvæga þjónustu og jafnvel hefur verið gert lítið úr kröfum þeirra sem hafa viljað standa vörð um öfluga verslun og þjónustu um allt land.

Mér segir svo hugur að sú þróun að þjónusta sé færð burt frá fólki eigi eftir að ganga til baka á fjölmörgum stöðum. Tryggingafélögin eru til dæmis að átta sig á því að lokun útibúa um allt land var feigðarflan og nú er víða verið að opna starfsstöðvar að nýju. Staðreyndin er sú að sum þjónusta á heima í nærumhverfinu og bæði hið opinbera og fyrirtæki þurfa að átta sig á því.

Af hálfu VR kemur sannarlega ekki til greina að draga úr þjónustu á landsbyggðinni, heldur einmitt fremur að auka hana eftir því sem félagsfólki fjölgar og samsetning þess verður fjölbreyttari. Þótt ekki sé stanslaus traffík inn á skrifstofur VR í Vestmannaeyjum, á Selfossi og víðar, þá er félagsfólki engu að síður mikilvægt að þjónustan sé á staðnum. Enn fremur er það gott fyrir starfsemina þar sem starfsfólk lifir og hrærist í nærsamfélaginu og hefur þá skilning og þekkingu á þeim staðbundnu áskorunum og tækifærum sem þar leynast. Loks er akkur í því fyrir VR að hafa aðgengi að hæfileikaríku starfsfólki á öllu sínu félagssvæði, en ekki eingöngu meðal þeirra sem kjósa að búa á höfuðborgarsvæðinu.

Gróskumikil uppbygging

Í grein minni í Eyjafréttum sl. vetur greindi ég frá því að hlyti ég kjör sem formaður VR myndi ég hafa reglubundna viðveru á skrifstofum VR um landið, bjóða félagsfólki til samtals og heimsækja vinnustaði. Í síðustu viku sótti ég Vestmannaeyjar heim. Ég átti góðan fund með Írisi Róbertsdóttur bæjarstjóra um atvinnuþátttöku á svæðinu, heimsótti félaga okkar í Drífanda, leit við í nokkrum verslunum og truflaði skrifstofustarfsfólk Vinnslustöðvarinnar stuttlega. Mér þótti sérlega gaman að verða vitni af þeirri gróskumiklu uppbyggingu sem á sér stað í Eyjum og tala við ungt fólk sem er komið aftur í heimahagana til að nýta bæði ný og gömul starfstækifæri og njóta þess að ala upp börnin sín í barnvænu samfélagi.

Stoppið að þessu sinni reyndist of stutt og ég hlakka til næstu viðkomu. Í millitíðinni hvet ég félagsfólk VR í Eyjum til að fylgjast með þróun þjónustu félagsins á staðnum og hika aldrei við að sækja skrifstofuna heim, hvort sem er með erindi eða erindisleysu.

 

Halla Gunnarsdóttir, formaður VR og Pæjumótsmeistari 1994.

Nýjustu fréttir

Vinnslustöðin
Fleiri erlendir starfsmenn læra íslensku í Eyjum
Aðsent
Taktu þátt í að móta menningarstefnu Vestmannaeyja
Fréttir
Snjóþungur öskudagur
Stjórnmál
Engin ákvörðun verið tekin um framboð
Sjávarútvegur
Loðnumælingum lokið
Fréttir
Útboð á áætlunarflugi til Eyja
Íþróttir
Sandra í lokahóp fyrir landsleikina gegn Svartfjallalandi
Stjórnmál
Sækist eftir 2. sæti í prófkjöri Sjálfstæðisflokksins
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.