Stuðningskerfi við einkarekna fjölmiðla verður fest í sessi til fimm ára samkvæmt frumvarpi sem Logi Einarsson, menningar-, nýsköpunar- og háskólaráðherra, kynnti á fundi ríkisstjórnar á þriðjudag. Samþykkti ríkistjórnin að frumvarpið yrði lagt fyrir Alþingi. Gert er ráð fyrir að þær lagabreytingar sem lagðar eru til með frumvarpinu styrki lýðræði í landinu og stuðli að vönduðum fréttaflutningi og upplýstri umræðu. Frá þessu er greint í tilkynningu frá menningar-, nýsköpunar- og háskólaráðuneytinu.

Fimm frumvörp í vinnslu:

Tilefni lagasetningarinnar má rekja til aðgerðaáætlunar í málefnum fjölmiðla sem kynnt var 19. desember 2025. Eftirfarandi frumvörp til stuðnings starfsumhverfi fjölmiðla á Íslandi eru fram komin eða í vinnslu hjá ráðuneytinu:

• Frumvarp til laga um breytingu á lögum um fjölmiðla nr. 38/2011 (stuðningur við einkarekna fjölmiðla)
  – Frumvarp lagt fram á vorþingi.

• Frumvarp til laga um breytingu á lögum um Ríkisútvarpið nr. 23/2013
  – Áætluð birting frumvarpsdraga í samráðsgátt eftir páska.
• Frumvarp til laga um breytingu á höfundalögum, nr. 73/1972 (hámarksrefsing fyrir stórfelld brot)
  – Frumvarp lagt fram á vorþingi.

• Frumvarp til laga um breytingu á höfundarétti vegna stafræns umhverfis höfundarréttar, nr. 73/1972 (DSM tilskipunin)
  – Stefnt að framlagningu frumvarps á haustþingi 2026.

• Frumvarp um menningarframlag streymisveitna
  – Stefnt að framlagningu endurskoðaðs frumvarps á haustþingi 2026.

Aukinn fyrirsjáanleiki og útgreiðslu flýtt

Aðgerðirnar miða að því að tryggja aðgengi almennings að áreiðanlegum fréttum á tímum upplýsingaóreiðu og veita fjölmiðlum viðspyrnu í alþjóðlegri samkeppni. Með því að festa stuðningskerfi í sessi til fimm ára vilja stjórnvöld skapa stöðugleika og fyrirsjáanleika í rekstri fjölmiðla. Umsóknarfrestur verður færður framar á árið og útgreiðslu stuðnings þar með flýtt.

Stuðningur verður afmarkaður við öflun og miðlun frétta og fréttatengds efnis. Fleiri tegundir starfa á fjölmiðlum verða felldar undir gildissviðið, myndstjórn og upptökustjórn, myndvinnsla og hljóðvinnsla, grafísk hönnun og vefforritun. Með því er áhersla lögð á að styðja áfram við kjarnastarfsemi fjölmiðla, sem er blaða- og fréttamennska á fréttaritstjórnum.

Nýmæli og breytingar eftir samráð

Hugað verður sérstaklega að staðbundnum miðlum sem gegna mikilvægu menningar- og lýðræðishlutverki í smærri byggðum og lagt til að þeir fái áfram 20% álag á fjárhæð styrks.

Helstu nýmæli frumvarpsins eru þau að veittur verði viðbótarstuðningur til fjölmiðla sem uppfylla sértæk skilyrði og sinna almennri fréttaþjónustu í almannaþágu á landsvísu. Skilyrðin lúta m.a. að fjölda starfsmanna á ritstjórn, kröfu um fjölbreytt efnistök með almenna og breiða skírskotun, kosningaumfjöllun á landsvísu og viðbragðsgetu allan sólarhringinn. Viðbótarstuðningur er til þess fallinn að styrkja stærri fjölmiðla með sterkar fréttaritstjórnir sem gegna lýðræðis- og öryggishlutverki í samfélaginu – auk þess sem skapaður er hvati fyrir aðra útgefendur fjölmiðla til að þróa fréttaþjónustu sína í þessa átt.

Frumvarpsdrög voru birt í samráðsgátt stjórnvalda á tímabilinu 27. febrúar -15. mars 2026 og bárust ráðuneytinu 18 umsagnir frá 23 umsagnaraðilum. Unnið var úr athugasemdum og nokkrar breytingar gerðar á frumvarpinu, m.a. þær að skilyrði um útgáfutíðni prentmiðla var lækkað úr 20 í 12 skipti á ári.

Þá voru gerðar breytingar á skilyrðum fyrir viðbótarstuðningi við fréttaþjónustu í almannaþágu á landsvísu:

• Skilyrði um fjölda stöðugilda á fréttaritstjórnum var lækkað úr 25 í 20.
• Skilyrði um kosningaumfjöllun á landsvísu var einfaldað.
  – Eftir breytingu hljóðar ákvæðið svo: Fjölmiðill sinni kosningaumfjöllun á landsvísu.
• Skilyrði um fjölmiðlun á a.m.k. tveimur miðlunarformum fellt út.
  – Með því er stuðningskerfið gert tæknihlutlaust og þröskuldur að viðbótarstuðningi lækkaður.
• Skilyrði um hlutfall ritstjórnarefnis á móti auglýsingum og hlutfall frumunnins efnis af ritstjórnarefni var afmarkað við prent- og vefmiðla.

Frumvarp um breytingar á lögum um Ríkisútvarpið

Þá er vinna við frumvarp um breytingar á lögum um Ríkisútvarpið langt komin í menningar-, nýsköpunar- og háskólaráðuneytinu. Frumvarpið er liður í vinnu stjórnvalda við að jafna samkeppnisumhverfi innlendra fjölmiðla. Samkvæmt frumvarpsdrögum verður lagt til að takmarka umsvif Ríkisútvarpsins á samkeppnismarkaði frá 2027 og að framlög til einkarekinna fjölmiðla verði aukin um samsvarandi fjárhæð, með þeim fyrirvara að Alþingi ákveður skiptingu fjárheimilda til málefnasviða og málaflokka í fjárlögum ár hvert.

Unnið er að því með fjármála- og efnahagsráðuneytinu að koma til móts við tekjutap RÚV með því að aflétta láni vegna eldri lífeyrisskuldbindinga félagsins, eins og gert hefur verið hjá nær öllum opinberum aðilum og fyrirtækjum sem sinna opinberum rekstri. Gert er ráð fyrir að frumvarpið verði birt í samráðsgátt eftir páska, segir í tilkynningu ráðuneytisins.