Eyjakonan Díana Dögg Magnúsdóttir og Andrea Jacobsen, tilvonandi leikmaður ÍBV, tryggðu sér í dag, með félagsliði sínu Blomberg-Lippe, oddaleik við Borussia Dortmund um þýska meistaratitilinn í handbolta með sigri í öðrum leik liðanna í úrslitaeinvíginu. 

Blomberg vann leikinn með einu marki, 28-27, en Dortmund hafði unnið fyrri leik liðanna með sömu markatölu. 

Báðar áttu þær stórar þátt í sigrinum en Díana Dögg skoraði þrjú mörk og gaf sjö stoðsendingar og Andrea skoraði þrjú mörk og gaf tvær stoðsendingar. 

Oddaleikurinn fer fram eftir viku á heimavelli deildarmeistara Blomberg-Lippe þar sem um verður skorið hvort Blomberg eða Dortmund muni hampa þýska meistaratitlinum.