Þegar rétt stemning myndast er fátt skemmtilegra en að taka þátt í samheldnu stjórnmálastarfi. Margir Vestmannaeyingar hafa fundið sér farveg til góðra verka í starfi Sjálfstæðisflokksins og það sem er jafnvel enn mikilvægara er að þá hafa margir Eyjamenn fundið vináttu og sterk tengsl sem stundum endast út lífið. Sjálfstæðisflokkurinn hefur sögulega verið sameiningarafl á svo margan hátt og mótunarafl til góðs fyrir velferð og samfélag Eyjamanna og af því erum við stolt.

Við þurfum þína hjálp
Það er hinsvegar mikilvægt fyrir okkar starf að fá nýtt fólk til leiks. Þess vegna munum við leggja sérstaka áherslu í starfi okkar fyrir komandi kosningar að taka vel á móti öllum sem til okkar mæta og jafnvel finna þér hlutverk ef áhugi er fyrir hendi. Hvort sem það kann að vera að taka kaffivakt í Ásgarði eða bara mæta og vera til staðar með okkur þá erum við þakklát, því kjarninn í öllu þessu starfi er samveran. Vertu því hjartanlega velkomin/n með okkur.

Met skuldaniðurgreiðslur, stóraukin velferð og aukið þjónustustig hafa einkennt okkar stjórn
Vestmannaeyjar hafa blómstrað undir stjórn Sjálfstæðisflokksins á þessari öld.

Þegar Sjálfstæðisflokkurinn var í forystu Vestmannaeyjabæjar á árunum 2006 til 2018 voru skuldir greiddar niður fyrir fimm og hálfan milljarð. Þrátt fyrir þessa miklu skuldarniðurgreiðslu sem stórbætti allan rekstur bæjarins þá skilaði Sjálfstæðisflokkurinn af sér búi með um 3,3 milljarða króna sjóði.

Á sama tíma og þessi mikla skuldaniðurgreiðsla átti sér stað án þess að gengið væri á sjóði bæjarins þá jókst þjónustustustigið í Vestmannaeyjum. Söfn eins og Eldheimar og Sæheimar komust á laggirnar, frístundarstyrk fyrir börn var komið á, leikskólinn Sóli var byggður, þjónustuíbúðir fyrir aldraða var komið í farveg, fjölnota íþróttahús var byggt og nýtt útisvæði við sundlaugina. Nýr Herjólfur var byggður og Vestmannaeyjabær tók yfir rekstur hans með bættu þjónustustigi og tíðni ferða jókst í kjölfarið svo eitthvað sé nefnt. Af þessari arfleið erum við stolt og við viljum nú tryggja að Vestmannaeyjar skari fram úr í lífsgæðum samhliða ábyrgri fjármálastjórn.

Nýr kafli hjá Sjálfstæðisflokknum í Eyjum
Það má segja að ákveðin kaflaskipti hafi átt sér stað hjá Sjálfstæðisflokknum þann 26. mars s.l., en þá var haldið prófkjör hjá Sjálfstæðisflokknum í fyrsta sinn í 32 ár. Kröftugt ákall hefur verið um prófkjör í samfélaginu undanfarin ár og Sjálfstæðisflokkurinn ákvað að bregðast við því. Öllum sem vildu var því gefin kostur á því að bjóða sig fram fyrir flokkinn og gaf metfjöldi frambjóðenda kost á sér, 15 Eyjapæjur og Peyjar. Við frambjóðendurnir erum geysilega ánægð með viðbrögð Eyjamanna í kjölfarið sem voru ótrúleg, enda mættu 927 Eyjamenn til þess að kjósa í Ásgarði sem er nær þriðjungur kosningabærra manna í Eyjum. Sjálfstæðisflokkurinn er eina framboðið sem gaf kost á prófkjöri þar sem allir gátu boðið sig fram í það sæti sem þau höfðu hug á. Við sjáum ekki eftir því og viljum leggja okkur fram við að bjóða fólk velkomið með okkur í starfið.

Kosningar um það hver mun stýra Vestmannaeyjum næstu fjögur árin eiga sér stað 14. maí n.k. Við viljum leggja áherslu á jákvætt kosningaferðalag og gagnlega uppbyggilega umræðu um málefni bæjarins sem er okkur svo kær. Fleiri hundruð Eyjamanna hafa stutt flokkinn dyggilega undanfarna áratugi og hafa leiðtogar Sjálfstæðisflokksins á landsvísu reglulega haft orð á því hversu verðmætt starfið í Eyjum er. Við leitum eftir þínum stuðning og viljum eiga samtal við þig og samveru á næstu vikum og munum bjóða upp á mörg tækifæri til þess. Við vonum að þú viljir vera með okkur.

Frambjóðendur Sjálfstæðisflokksins óska Eyjamönnum gleðilegs sumars !
Eyþór Harðarson
Hildur Sólveig Sigurðardóttir
Gísli Stefánsson
Margrét Rós Ingólfsdóttir
Rut Haraldsdóttir
Sæunn Magnúsdóttir
Óskar Jósúason
Halla Björk Hallgrímsdóttir
Kolbrún Anna Rúnarsdóttir
Hannes Kristinn Sigurðsson
Jón Þór Guðjónsson
Theódóra Ágústsdóttir
Arnar Gauti Egilsson
Ragnheiður Sveinþórsdóttir
Valur Smári Heimisson
Ríkharður Zoega
Aníta Óðinsdóttir
Unnur Tómasdóttir