Eftir óhappið í Herjólfi um helgina, þar sem bílalyfta kramdi tvo bíla, heyrist nú enn hærra í hagsmunahópi dýraeigenda í Vestmannaeyjum.

Í frétt um málið á visir.is kemur fram að undirskriftalisti með 1.400 undirskriftum, um bætta aðstöðu gæludýra um borð, verði afhentur stjórn Herjólfs.

Núverandi fyrirkomulag er þannig að sé gæludýr með í för, þarf dýrið ýmist að vera í bíl á bíladekki eða í lokaðri geymslu í búri á bíladekki. Gildir það bæði um ferðir Herjólfs til Landeyjahafnar og Þorlákshafnar. Bíladekkið er þó ekki á rýmingaráætlun Herjólfs, komi eitthvað upp á.

Þóra Gísladóttir, formaður dýravinafélagsins í Vestmannaeyjum segist vita til þess að hundur hafi verið í bíl á bíladekkinu þegar slysið varð um helgina, þó ekki í bílunum sem krömdust.

„Það segir sig sjálft að ef þú ert með dýr einsamalt niðri á bíladekki að þá kemst þú ekki niður til þess og dýrið þitt getur að sjálfsögðu ekki reddað sér upp.“

Þóra segir helsta vilja félagsins að fá að vera með dýrin á afmörkuðu svæði, ekki sé verið að tala um að leggja allan Herjólf undir dýrahald. Þau séu að tala um lítið afmarkað svæði þar sem leyfilegt sé að vera með dýr í bandi eða búri til þess að þau upplifi ekki kvíða, stress og vanlíðan á meðan ferðinni stendur.