Margir veðurbarðir en þó kátir þjóðhátíðargestir hafa komið sér fyrir í Herjólfshöllinni vegna veðurs. Blásið hefur hressilega alla helgina og á tímum fylgt aftakarigning.

„Við erum á toppnum núna,“ segir Júlía Dagbjört Styrmisdóttir, gestur á Þjóðhátíð, eftir að hafa flutt inn í Herjólfshöll með sínu fólki þegar tjaldið þeirra gaf sig á VIP tjaldsvæðinu á Þórsvelli í gær.

Hún segir helgina hafa byrjað vel en eftir föstudagskvöldið þá hafi tjaldið þeirra tekið að fjúka og það svo gjöreyðilagst á laugardag.

Hæstánægð með nætursvefninn

„Í gær þá brotnaði tjaldið og stangirnar bara byrjuðu að fuðra upp í rokinu, þannig að við vorum ekki með neina beinagrind fyrir tjaldið. Þannig að þá loksins opnaði Höllin og þá fórum við inn,“ segir Júlía og er hópurinn ánægður með svefninn sem þau fengu í nótt.

„Það er smá kalt en það er fínt að það sé loftræstikerfi, annars væri örugglega ógeðsleg lykt hérna inni. En maður er bara í föðurlandinu, með dúnsvefnpokann, og það fer rosalega vel um okkur.“

„Drullu“ góð stemning

„Mér líður smá eins og ég sé á hóteli eða bara í stærsta „sleepover“ sögunnar,“ segir Júlía sem segir stemninguna í Höllinni vera „drullu“ góða og bætir við að hópurinn hafi fundið fyrir mikilli hjálp eftir flutninginn.

Kamrar eru fyrir utan og geta gestir komið inn í Týsheimilið til að sækja sér vatn.

Ekki til lélegt veður, bara lélegt tjald

„Ég held ég sé komin með nóg af því að vera í tjaldi í bili,“ segir Júlía en þrátt fyrir allt segist hún alveg geta hugsað sér að koma að ári ef að hún finnur gistingu.

„Það er ógeðslega gaman að vera í Dalnum með vinum sínum, hitta allt fólkið sitt, en mjög leiðinlegt að lenda í svona veðri. En við búum á Íslandi þannig maður þarf bara að búa sig undir það. Það er ekki til lélegt veður, bara léleg föt og lélegt tjald, greinilega,“ segir Júlía að endingu.