Fulltrúar Samtaka atvinnulífsins, sem fer með samningsumboð Eimskips og Sjómannafélags Íslands, sem semur fyrir hönd undirmanna á Herjólfi, funduðu í dag vegna verkfalls undirmanna. Verkfallið hefur staðið í rétt tæpar þrjár vikur en samkvæmt upplýsingum sem fengust eftir fundinn, þokast lítið í sáttaátt. Svo mikið ber á milli að ekki þótti ástæða til að boða til nýs fundar en samkvæmt lögum þarf að halda fund með minnst tveggja vikna fresti. �?að er því allt í hnút í deilunni og engin lausn í sjónmáli. Á meðan tapa einstaklingar og fyrirtæki í Vestmannaeyjum háum fjárhæðum á degi hverjum og við það verður ekki unað mikið lengur.