Erlendir ríkisborgarar í Vestmannaeyjum eru nú orðnir 14,4% af íbúafjölda bæjarins. Þetta má sjá í nýjum gögnum um íbúafjölda í mælaborði Byggðastofnunar.

Þar má lesa úr að íbúafjöldi í byrjun ársins hafi verið 4.444 í Eyjum. Þar af eru erlendir ríkisborgarar 639 talsins eða 14,4%. 376 karlar (58,8%) og 263 konur (41,2%). Meðalaldur erlendra ríkisborgara í sveitarfélaginu er 32,8 ár. Síðast þegar Eyjar.net birti sambærilegar tölur fyrir 4 árum voru erlendir ríkisborgarar 11% bæjarbúa.

64% landsmanna á höfuðborgarsvæðinu

Í frétt á vef Sambands íslenskra sveitarfélaga segir að Hagstofa Íslands hafi í lok mars gefið út ný gögn um íbúafjölda á Íslandi. Þann 1. janúar 2024 voru íbúar landsins 383.726, þar af voru erlendir íbúar 63.528. Búið er að uppfæra mælaborð Byggðastofnunar um íbúafjölda sveitarfélaga og byggðakjarna og um íbúa svæða eftir ríkisfangi með þessum nýju gögnum.

Í mælaborðunum má sjá að 365.256 (95%) búa í byggðakjörnum og 18.470 (5%) í dreifbýli. Á höfuðborgarsvæðinu eru 244.177 íbúar (64% landsmanna) en 139.549 (36%) utan höfuðborgarsvæðis. Hæst hlutfall erlendra íbúa er áfram í Mýrdalshreppi (58%) og þar næst í Skaftárhreppi (37%) og Bláskógabyggð (34%). Meðalaldur erlendra ríkisborgara er 33,2 ár en íslenskra ríkisborgara 39,3 ár.

https://eyjar.net/2020-02-02-11-baejarbua-erlendir-rikisborgarar/