Það var í ýmis horn að líta hjá lögreglunni í vikunni sem leið og þurftu bæjarbúar á aðstoð lögreglu að halda í hinum ýmsu tilvikum. Í tvígang var óskað eftir lögreglu á öldurhús bæjarins vegna átaka á milli gesta en hins vegar liggja engar kærur fyrir vegna þeirra átaka. Eitt fíkniefnamál kom upp í vikunni en að morgni sl. sunnudags lagði lögreglan hald á ætlað kókaín og áhöld til neyslu fíkniefna eftir húsleit í heimahúsi hér í bæ. Málið telst upplýst, en sá er þarna á í hlut hefur áður komist í kast við lögin vegna fíkniefnamisferlis.