Haldin var Starfakynning í Þekkingarsetri Vestmannaeyja í dag. Þar kynntu starfsmenn fyrirtækja og stofnana í Vestmannaeyjum störf sín og þá menntun sem þeir hafa. Markmiðið með kynningunni er að auka þekkingu ungmenna og almennings á störfum í heimabyggð, ásamt því að efla sambandið milli skóla og atvinnulífs. Þetta er í þriðja skiptið sem kynningin er haldin og hefur Viska, fræðslu- og símenntunarmiðstöð Vestmannaeyja leitt verkefnið frá upphafi.

Það voru 40 aðilar sem kynntu fjöldan allan af störfum og gekk kynningin mjög vel að sögn skipuleggenda. “Þetta gekk bara ótrúlega vel og við vorum mjög ánægðar með mætinguna.

áttundir til tíundi bekkur GRV kom um morguninn auk nemenda frá FIV. Almenningur gat einnig komið og kynnt sér störfin. Við heyrðum ekki annað en að mikil ánægja væri á meðal gesta og þeirra sem tóku þátt og kynntu störfin,” sagði Minna Björk Ágústsdóttir hjá Visku í samtali við Eyjafréttir.