Á fundi bæjarstjórnar var samþykkt að Egill Arnar Arngrímsson taki sæti í upplýsingavettvangi um samgöngur á sjó milli lands og Eyja. �?á samþykkti bæjarstjórn að fela bæjarráði að koma á allt að 10 manna bakhópi hvað þennan upplýsingavettvang varðar sem verður fulltrúa bæjarins til halds og trausts.

Undanfari þessa máls er að á 3033. fundi bæjarráðs þann 13. september s.l. var eftirfarandi erindi afgreitt með því að vísa því til næsta fundar í bæjarstjórn:

Erindi frá Innanríkisráðuneytinu dags. 25. ágúst s.l. þar sem fram kemur að Innanríkisráðherra hefur ákveðið að koma á upplýsingavettvangi helstu aðila sem koma að samgöngum við Vestmannaeyjar á sjó. Tilgangurinn er að stuðla að samráði og betra upplýsingaflæði milli þeirra sem hafa hagsmuni af greiðum samgöngum ef það má verða til þess að framkvæmdin verði skilvirkari og betri. Gert er ráð fyrir að þátttakendur verði kallaðir saman eftir þörfum og að lágmarki tvisvar á ári. Hér með er óskað eftir að Vestmannaeyjabær tilnefni fulltrúa sinn í hópinn.

Bæjarráð fagnar því að ákveðið sé að stofna upplýsingavettvang um samgöngur á sjó milli lands og Eyja en ákvörðunin kemur í kjölfar fundar sem bæjarráð átti með Innanríkisráðherra í ágúst s.l. Bæjarráð vísar málinu til umræðu og afgreiðslu á næsta fundi bæjarstjórnar í lok september n.k.