Getum við? - Eyjafréttir

Eyjafréttir
·
Fréttir
·
9. janúar 2020

Getum við?

Í lífinu skiptast ávallt á skin og skúrir hjá okkur mannfólkinu, í nærumhverfi okkar, í landsmálum, svo og í heimsmálunum sjálfum. Nýliðið ár var engin undantekning að þessu leyti. Því miður eru vandamál jarðarinnar allrar sífellt að verða alvarlegri og ef leiðtogar heimsins vakna ekki til ábyrgðar mun ástandið enn eiga eftir að versna. Um þetta ætla ég ekki að fjalla hér þessu sinni.

Mig langar hér hins vegar að nefna lítillega nokkra þætti sem mér þóttu merkilegir á síðast ári hér á landi en einnig sérstaklega í Vestmannaeyjum, þætti sem bæði eru afar jákvæðir og horfa mjög til bóta fyrir samfélag okkar.

Ég fagna því sérstaklega að nú verður komið á fót þriggja þrepa skattkerfi með nýju lágtekjuþrepi. Sú aðgerð á eftir að auka verulega ráðstöfunartekjur tekjulægsta hópsins í samfélaginu. Í aðgerðinni felst ekki allsherjarlausn á réttlátara skattkerfi en hún er sannarlega mikilvægt skref til bóta.

Mér finnst ánægjulegt að nú þegar mun fæðingarorlof lengjast úr 9 í 10 mánuði og um næstu áramót úr 10 í 12 mánuði. Þannig er stigið stórt skref í réttindamálum barnafjölskyldna í landinu.

Ný heilbrigðisstefna til ársins 2030 hefur verið samþykkt á Alþingi. Þessi stefna hefur meðal annars að markmiði að gera alla heilbrigðisþjónustu betri og ódýrari fyrir þá sem á henni þurfa að halda. Langþráð skref í rétta átt.

Tilraunaverkefni um notkun sjúkraþyrlu til að styrkja sjúkraflutninga í landinu er í undirbúningi. Þetta er sérstakt fagnaðarefni fyrir okkur Vestmannaeyinga sem mun gera sjúkraflug til og frá Eyjum öruggara og skilvirkara enda er gert ráð fyrir að sjúkraþyrla verði staðsett þannig að hún gagnist okkur Eyjamönnum sem best.

Og úr því ég er farinn að tala um Vestmannaeyjar þá var það sérstakt fagnaðarefni þegar nýjar þjónustuíbúðir aldraðra voru vígðar sl. sumar. Það var þörf og góð viðbót í þjónustu við aldraða í Eyjum.

Ég er einnig mjög ánægður með að á síðasta ári voru stigin fjölmörg önnur framfaraspor til heilla bæjarfélaginu okkar. Hér nefni ég til dæmis heilsueflingaráætlun eldri borgara, starf æskulýðsfulltrúa var endurvakið, frístundastyrkur bara og unglinga var hækkaður og staða fjölmenningarfulltrúa var sett á stofn. Allir þessir þættir og reyndar fjölmargir aðrir eru mikilvægir hlekkir í að efla samfélagið. Þetta sannar einnig að við getum ef við viljum. Því er full ástæða til að fagna nýju ári í von um bættan hag og betra samfélag.

Gleðilegt nýtt ár.

Ragnar Óskarsson

Nýjustu fréttir

Íþróttir

ÍBV vann Álaborg í æfingaleik á Spáni

Áhugavert

Dýpkun Landeyjahafnar kostaði 600 milljónir í fyrra

Úr blaði Eyjafrétta

Gamla myndin

Sjávarútvegur

Eyjarnar lönduðu fullfermi í heimahöfn

Aðsend grein

Þakklát fyrir traustið sem mér hefur verið sýnt

Fréttir

Samþykktu rekstrarviðauka fyrir Náttúrustofu Suðurlands

Fréttir

Skoða byggingu sjúkrasundlaugar

Úr blaði Eyjafrétta

Birgir Nielsen um tónlistina og lífið á skólabekk

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki