Það er óhætt að fullyrða að handboltaleikirnir sem fram fara í íþróttamiðstöðinni í dag séu af stærri gerðinni. Veislan hefst á leik ÍBV og Vals í 16 liða úrslitum bikarkeppni HSÍ. Stutt er síðan að liðin mættust í Vestmannaeyjum þar sem Valsmenn höfðu betur. Leikmenn Vals komu til Vestmannaeyja í gærkvöldi og því ekkert því til fyrirstöðu að flauta til leiks klukkan 14:00 í dag.

Það verða ekki síðri taktar á paketinu við Brimhóla klukkan 17:00. Þá fer fram “Stærsti íþróttaviðburður Íslands ár hvert – STJÖRNULEIKURINN!,” eins og segir í tilkynningu frá ÍBV. Viðburður sem ekki þarf að kynna fyrir neinum, en okkar helstu stjörnur stíga fram á gólfið og sýna flott takta. Um er að ræða styrktarleik eins og venjulega, til styrktar Krabbavarnar í Vestmannaeyjum.

“Oft hefur verið þörf en nú er nauðsynlegt að troðfylla húsið á báðum viðburðum og mynda geggjaða stemningu á pöllunum.”