Kröfulýsing gríðarstórt inngrip í mat á eignarrétti: „Það er óhætt að segja að framkomnar þjóðlendukröfur fjármálaráðherra sem beinast að eyjum og skerjum við Ísland veki mikil viðbrögð fólks, þá sérstaklega sveitarstjórnarfólks sem segir kröfulýsinguna vera gríðarstórt inngrip í mat á eignarrétti og framtíðarsýn fjölmargra íbúa og landeigenda um land allt. Flestar eyjar sem kröfurnar beinast að eru þinglýstar eignir einstaklinga, sveitarfélaga og annarra aðila og í sumum tilvikum hefur ríkið selt eyjar sem það ætlar nú að taka aftur til sín,“ segir Ingibjörg Isaksen oddviti Framsóknar í Norðausturkjördæmi á Facebook síðu sinni í gær.

Full langt seilst

„Upphaflegur tilgangur með setningu laga um þjóðlendur var að leysa úr ágreiningi sem ríkt hafði í áratugi um eignarhald á hálendissvæðum landsins eða þeim svæðum sem lengst hafa verið nefnd afréttir og almenningar. Að mínu mati er nú full langt seilst frá upphaflegum markmiðum laganna. Nú er verið að sækjast eftir landsvæði þar sem nú eru m.a. fasteignir og rúmast innan deiliskipulags sveitarfélaga. Það er eðlilegt að vakin sé athygli á þessu því ljóst er að þetta muni hafa töluverðan kostnað í för með sér fyrir sveitarstjórnir og eigendur þessara landsvæða. Að auki getur krafan skapað mikla óvissu og hamlað mikilvægri uppbyggingu og verðmætasköpun,“ segir Ingibjörg.