Herjólfur flutti alls 85.033 farþega í ágúst 2025, sem er örlítil fækkun frá sama mánuði í fyrra segir Ólafur Jóhann Borgþórsson, framkvæmdastjóri Herjólfs ohf. í samtali við Eyjafréttir.

„Júlí og ágúst er alla jafna stærsti mánuðurinn í farþegaflutningum og í ár erum við mjög ánægð með árangurinn, og er þá helsti breytiþátturinn hvernig Þjóðhátíðin lendir á þessa mánuði, “ segir Ólafur. Fimmtudagurinn á Þjóðhátíð var nú í júlí sem skýrir að farþegum fækkar lítillega á milli ára í ágústmánuði.

„Annað sem hafði  áhrif á farþegatölurnar í ágúst  var að við þurftum að sigla heilan dag til Þorlákshafnar. Það gerist afar sjaldan í ágúst, en veðrið réði ferðinni. Slíkt hefur alltaf áhrif á farþegatölurnar, enda er ferðin lengri og fáir sem líta á slíkar ferðir sem einhverjar skemmtisiglingar.”

Fyrstu átta mánuði ársins eru taldir saman eru farþegar Herjólfs alls 361.115 sem er talsvert meira en nokkurn tímann áður. Og það eru vendingar framundan.

„Herjólfur siglir til Hafnarfjarðar aðfararnótt mánudags og verður í slipp næstu vikurnar, Breiðafjarðarferjan Baldur leysir Herjólf af. Hann ber færri farþega og færri bíla  og til að mæta því hefur stjórn Herjólfs ákveðið að taka aftur upp átta ferða áætlun til að röskunin verði sem allra minnst. Herjólfur kemur svo til baka í lok september,” segir Ólafur Jóhann.