„Við komum hingað á miðvikudaginn síðasta og erum búin að vera hér í fimm daga. Höfum verið á slóðum Jesús Krists en verðum að sleppa helmingi ferðarinnar vegna stríðsins sem hófst á laugardaginn,“ sagði Hjalti Kristjánsson, læknir í Vestmannaeyjum þegar rætt var við hann upp úr tíu í morgun. Hann var þá á leið í rútu frá Jerúsalem í Ísrael til Amman í Jórdaníu. Með honum voru Vera Björk Einarsdóttir, eiginkona hans og hópur Íslendinga.  Til Amman var væntanleg flugvél frá Icelandair sem send var til að flytja heim Íslendinga sem staddir voru í Ísrael þegar Hamassamtökin hófu árás á Ísrael á laugadaginn.

„Ferðaskrifstofan metur það þannig að ástandið hér sé mjög ótryggt og réttast að við förum heim. Og öruggasta leiðin sé í gegnum Amman og eigum við bókað flug þaðan í kvöld til Rómar. Þaðan fljúgum við heim og verðum komin einhvern tímann í nótt eða fyrramálið að íslenskum tíma.“

Hjalti og Vera Björk eru í 35 manna hópi Íslendinga og þau einu frá Eyjum. „Annar hópur fór ekki sömu leið og við. Við höfum séð sprengjuregn á leiðinni því það eru enn átök á Vesturbakkanum og innan Ísraels. Þeir hafa ekki allir náðst Hamasmennirnir sem réðust  inn í landið. Við fylgdumst með atburðunum í gegnum CNN og fararstjórinn var í sambandi við ferðaskrifstofuna heima. Annar fararstjórinn er ísraelskur og tók þátt í Sex daga stríðinu 1967 og var sjálfboðaliði í Yom Kippur stríðinu 1973. Hann fór með okkur á Golanhæðirnar sem barist var um 1967. Var mjög áhrifaríkt að heyra hann lýsa átökum í þessum stríðum. Svo byrjuðu lætin daginn eftir,“ sagði Hjalti.

Ekki urðu þau vör við átökin meðan þau voru í Jerúsalem en á leiðinni að landamærunum sáu þau sprengingar ekki svo langt í burtu. „Við eigum eftir um tvo tíma að landamærunum og svo tekur við akstur til Amman,“ sagði Hjalti þegar rætt var við hann. Stuttu seinna hringdi hann og sagði það ósk utanríkisráðuneytisins að þau létu ekki vita af sér. Það væri gert af öryggisástæðum.

Komin í loftið

Rétt í þessu sendi Hjalti skilaboð um að þau væru komin í loftið. „Þvílík stemning um borð. Klappað fyrir starfsfólkinu og allir svo glaðir,“ sagði Hjalti. „Hálfmeyr og mikill léttir. Útlendingarnir fengu líka ræðu og klöppuðu mikið. Vissi að þessi ferð yrði einstök, upplifun og er uppnuminn. Erum komin í loftið.“

Samkvæmt síðustu fréttum er áætlað að vélin lendi í Keflavík snemma í fyrramálið.

Myndin var tekin úr rútunni í dag og sést reykur stíga upp þar sem sprengjur hafa fallið.