Fræðsluráð Vestmannaeyja tekur jákvætt í tillögur um breytingar á umferð við leikskólann Kirkjugerði. Meðal þess sem lagt er til er að opna fyrir einstefnuakstur frá bílastæði leikskólans og út á Hraunveg. Jafnframt eru uppi hugmyndir um að fjölga bílastæðum á svæðinu til að bæta aðgengi.

Ráðið telur mikilvægt að ráðast í slíkar úrbætur til að bæta bæði aðgengi og umferðaröryggi við leikskólann.

Skóladagatal 2026–2027 staðfest

Á sama fundi staðfesti fræðsluráð skóladagatal leik- og grunnskóla ásamt frístund fyrir skólaárið 2026–2027. Kennsludagar í grunnskóla verða 180 og hefst skólaárið 24. ágúst. Skólaslit fara fram 9. júní og vetrarleyfi verður dagana 19.–23. október.

Frístund verður opin alla virka daga frá klukkan 12:30 til 16:30 samkvæmt dagatalinu og hefst sumarfrístund 10. júní.