Hnepptu þriðja sætið á kraftminnsta bílnum í keppninni

Eyjafréttir
·
Fréttir
·
16. ágúst 2023

Eyjahjónin Guðni Grímsson og Kristín Hartmannsdóttir kepptu um helgina á CanAm Iceland Hill Rally sem er þriggja daga þolaksturskeppni um hálendið þar sem keyrðir eru samtals rúmlega 400 kílómetrar. Keppnin var krefjandi og dagskráin stíf. Dagarnir byrjuðu snemma og voru langir en þau gerðu sér lítið fyrir og enduðu í 3. sæti í sínum flokki og því 4. í heildina.

Aldrei komið nálægt rallý áður

„Við erum mjög sátt. Við tókum þátt í þessari keppni til að hafa gaman og vorum að keppa á móti vönum rallý köppum svo við erum virkilega ánægð með okkar árangur” segir Kristín en þetta er í fyrsta skiptið sem Vestmannaeyingar eru skráðir í rallý.

Sjálf hafa þau aldrei komið nálægt rallý áður en Guðni hefur keppt í torfæru og Kristín fylgt honum í „service”. Mótorsport hefur verið áhugamál og samvera þeirra hjóna lengi vel og í 10 ár ferðuðust þau víðsvegar um heiminn með torfærubílinn Kubb.

Topp græja sem stóðst allar væntingar

Bíllinn er Can-am Maverick XRC Turbo buggy bíll sem þau fluttu sjálf inn frá Bandaríkjunum og er alveg óbreyttur frá framleiðanda. Hann stóðst allar væntingar og gott betur en það þrátt fyrir að hafa verið krafminnsti bíllinn í keppninni, verandi 120 hestöfl. „Við lentum aldrei í neinum bilunum og sprengdum engin dekk. Topp græja” segir Kristín.

Þau segja utanumhald og keppnisstjórn hafa verið til fyrirmyndar. Þessa þrjá daga keyrðu þau tólf sérleiðir og voru því tólf rásmörk í heildina. Keppendur fengu GPS punkt af endamörkunum og létta leiðarlýsingu af brautunum. Þá var til dæmis keyrt um Óbrinnishólahraun, Lyndgdalheiði vestur, Tröllháls, Kaldadal, Dyngjufjallaleið og Sigöldu. Aksturinn var mikill, bæði í sérleiðum og á milli sérleiða.

Undirbúningurinn hafi ekki verið gríðarlegur og engar æfingar teknar. Sett voru keppnisvottuð belti í bílinn, neyðarrofa og slökkvitæki og svo lagt í hann. Markmiðið var fyrst og fremst að hafa gaman.

„Kalli félagi okkar bauðst svo til að koma með og aðstoða og erum við virkilega þakklát fyrir það að hann nennti okkur. Einnig náðum við að plata Bæring og Rakel til að vera með, svo það væsti ekki um okkur á milli leiða.”

Mótorsport er áhugamál og samvera þeirra hjóna.

Nýjustu fréttir

Fréttir

Kallað eftir hugmyndum fyrir Goslokahátíð 2026

Herjólfur

Ein ferð í Landeyjahöfn

Áhugavert

Heilsurækt við Íþróttamiðstöðina boðin út á ný eftir kærumál

Aðsent

Góður mánudagur sem varð enn betri!

Sjávarútvegur

Fimm skip til loðnuleitar

Vinnslustöðin

Löndun Breka VE í Grundarfirði – flókið verkefni og fumlaus vinnubrögð

Áhugavert

Gong slökun, endurstilling í hraða nútímans

Fréttir

Bæjarráð gagnrýnir samgönguáætlun

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki