Arion banki stóð fyrir fyrirlestri um fjárfestingar 11. apríl sl. í Visku. Þar var verkefnið Konur fjárfestum kynnt ásamt því sem farið var yfir grunninn að fjármálum og fjárfestingum. Iða Brá Benediktsdóttir, aðstoðarbankastjóri Arion banka og framkvæmdastjóri viðskiptabankasviðs, kynnti verkefnið. Að auki þá fór Snædís Ögn Flosadóttir forstöðumaður á mörkuðum Arion banka yfir grunninn að fjárfestingum, lykilhugtök og hvernig á að byrja, reglubundinn sparnað, lífeyrissjóði, sjóði, hlutabréf og skuldabréf. Með í för var jafnframt bankastjóri Arion banka, Benedikt Gíslason.

Iða Brá er fædd og uppalin í Eyjum og við tókum hana tali af þessu tilefni og spurðum hana út í það hvers vegna bankinn sé að leggja þetta mikla áherslu á að konur fjárfesti í ríkari mæli, og það stóð ekki á svörum.

„Þátttaka í fjármálamarkaði er mikilvæg leið til að hafa áhrif í samfélaginu, samfara því að byggja upp eigin framtíð. Eftir að hafa lagt í umtalsverða vinnu við að greina stöðuna, þ.e. greina fjárfestingar og eignastöðu kvenna annars vegar og karla hins vegar þá sáum við að full ástæða var til að hvetja konur til dáða. Niðurstaðan þarf því miður ekki að koma neinum á óvart en við sáum svo ekki var um villst að það hallar umtalsvert á konur þegar kemur að þátttöku á fjármálamarkaði. Við einfaldlega viljum leggja okkar af mörkum til að jafna þennan mun og fórum því af stað með þetta langtíma átaksverkefni með það markmið að efla konur þegar kemur að fjárfestingum. Sambærilegum verkefnum hefur verið ýtt úr vör á öðrum Norðurlöndum með góðum árangri.“

Fjárhagslegt sjálfstæði kvenna

En hvers vegna er mikilvægt að konur séu einnig virkar á fjármálamarkaði? „Í mínum huga eru í grunninn tvær ástæður fyrir því af hverju konur eiga að huga vel að sínum fjármálum og fjárfesta. Sú fyrri er nokkuð augljós og felst í fjárhagslegu sjálfstæði hverrar konu og mikilvægi þess að þekkja sína stöðu, byggja undir eigið frelsi til ákvarðanatöku og hafa þannig stjórn á eigin lífi. Sú seinni er ekki síður mikilvæg og felst í því sem við öll vitum að með fjárfestingu er samfélagið okkar fjármagnað. Fyrirtækin, atvinnulífið, innviðirnir okkar, ríki og sveitarfélög. Samfélagið allt þarf fjármagn og fjárfesting er eitt af því sem knýr það áfram. Fjármagn knýr einnig áfram rannsóknir og vöruþróun og stýrir þannig ákvörðunartöku. Með því að fjárfesta getum við stuðlað að jafnari þróun samfélagsins fyrir öll kyn. Haft raunveruleg áhrif.“ segir Iða Brá.

Iða bendir á að þau hafi áttað sig á því að líklega þyrftu þau að mæta konum á  þeirra forsendum. „Mögulega vilja konur aðra nálgun þegar kemur að fjármálum og fjármálafræðslu og því ákváðum við að breyta okkar nálgun, stíga fastar inn og mæta þeirra óskum og þörfum. Í okkar huga er þetta samfélagslega mikilvægt verkefni – þetta er í raun mikilvægt jafnréttismál. En þar til viðbótar sjáum við mikil viðskiptatækifæri í því að efla konur til fjárfestinga – við ætlum einfaldlega að stækka kökuna.“

Iða segir konur hafa sótt í sig veðrið á undanförnum áratugum á öllum sviðum, meðal annars í atvinnulífinu. Dæmi um það er að konur eru í dag um 22% framkvæmdastjóra stórra fyrirtækja sem er mikil aukning frá árinu 1999 þegar konur voru einungis um 5% þeirra sem stýrðu stórum fyrirtækjum landsins, en hún bendir jafnframt á að 22% er hins vegar nokkuð langt frá 50%.

„Svo er það þannig að þegar kemur að stærstu eign hvers einstaklings, lífeyrissjóðnum, er heilt kynslóðabil á milli karla og kvenna. Með öðrum orðum, það mun taka konur heila kynslóð til viðbótar við karlmenn að ná fullþroskaðri lífeyriseign. Þar er um ævisparnað að ræða og því sjáum við söguna svo vel í þeim tölum. Það eimir lengi eftir að þeim muni sem myndast í sparnaði sem er auðvitað beint fall af tekjum. Fyrir vikið er einmitt algjört lykilatriði að konur sérstaklega hugi vel að sínum fjármálum og byggi undir sitt fjárhagslega frelsi,“ segir Iða Brá að lokum.