Umræða um sorpmálin og nýkynnta gjaldskrá í málaflokknum er nokkuð hávær í Vestmannaeyjum í dag. Málið hefur verið til meðferðar í stjórnsýslu Vestmannaeyjabæjar undanfarna mánuði og var að lokum samþykkt á fundi bæjarstjórnar í síðustu viku.

Um er að ræða stórt hagsmunamál sem hefur áhrif á hvern einasta íbúa bæjarins, fyrirtæki og bæjarsjóð. Mótbárur minnihlutans á þarsíðasta fundi framkvæmda- og hafnarráðs í kjölfar kynningar á nýrri gjaldskrár varð til þess að mál þetta var tekið til umræðu á síðasta bæjarstjórnarfundi.

„Bæjarfulltrúar Sjálfstæðisflokksins taka undir bókun fulltrúa flokksins í framkvæmda- og hafnarráði. Upplýsingagjöf vegna sorpútboðsins, framsetning gagna og gjaldskrár er stórlega ábótavant og í raun óásættanleg. Við gerum alvarlegar athugasemdir við það.

Það orkar tvímælis að innheimta gjald fyrir t.d. gler, garðúrgang og textíl sem flokka má sem verðmæt efni til endurvinnslu. Hættan er sú að almenningur muni setja meira í almennt sorp heldur en áður og aukinn kostnaður verði við það. Það mun því vinna gegn upphaflegum tilgangi sorpflokkunar.” sagði í bókun minnihluta bæjarstjórnar.

Sjá einnig: Ekki eining um hækkanir og breytingar á gjaldskrá

Fór fyrst fyrir bæjarráð

Íris Róbertsdóttir, bæjarstjóri tók fram á bæjarstjórnarfundinum að hún vissi lítið um málið og benti í því samhengi á að hún sæti ekki í framkvæmda- og hafnarráði. Hún benti einnig á mikilvægi og ábyrgð ráðsmanna á því að kynna sér gögn við stórar ákvarðanir. Eyjafréttir spurðu Sæunni Magnúsdóttur sem sæti á í framkvæmda- og hafnarráði um málið.

„Í málum sem þessum er farvegurinn alla jafna sá að mál eru tekin fyrir í framkvæmda- og hafnarráði (eða viðkomandi fagráði) og fara síðan fyrir bæjarráð/bæjarstjórn eftir eðli mála.
Í þessu máli fór málið hins vegar fyrst fyrir bæjarráð. Það var þann 24.09.2024 (skv. fundargerð sat bæjarstjóri þann fund) og var framkvæmda- og hafnarráði gefin sú skýring að það væri til þess að flýta fyrir/koma í veg fyrir tafir,“ segir Sæunn.

Bæjarráð samþykkti erindið, líkt og sjá má í afgreiðslu ráðsins hér að neðan.

Leggur til úrbætur

Hvað leggur þú til að verði gert núna?

​Það er ansi erfitt að vinda ofan af þessu úr því sem komið er enda hefur samningurinn við Terra öðlast gildi og félagið tekið við verkefninu. Ég myndi þó vilja að reynt yrði til hins ýtrasta að koma því til leiðar að það yrði gjaldfrjálst að skila efni sem í raun eru verðmæti á móttökustöð, sbr. t.d. gjaldskrá Terra á Akranesi. Þá myndi ég einnig vilja að íbúar fengju klippikort, eins og tíðkast víða um landið, þannig að þeir gætu hent hóflegu magni án endurgjalds 10-12 sinnum á ári enda gæti það minnkað höggið fyrir mörg heimili. Þá tel ég mjög mikilvægt að vanda betur til verka næst þegar þessi málaflokkur er boðinn út, segir Sæunn Magnúsdóttir.