Laufey Welcome Center, ný þjónustumiðstöð við Landeyjarhafnarafleggjarann er komin vel á veg og reiknar Eyjamaðurinn Sveinn Waage markaðs- og rekstrarstjóri Svarsins ehf, sem byggir Laufey að stöðin verði klár að taka á móti gestum fyrir jól í það minnsta.

„Já, það er ofsalega ánægjulegt að sjá Laufey rísa eftir áralangan undirbúning þar sem gengið hefur á ýmsu s.s. einn heimsfaraldur með tilheyrandi áskorunum ásamt vaxta- og verðhækkunum sem við þekkjum öll í dag. En hingað erum við komin.“

Sveinn segir mjög hvetjandi að finna fyrir áhuga og stuðningi frá Eyjum, ekki bara hagsmunaaðilum í ferðaþjónustu, heldur hinum almenna Eyjamanni sem sér hvað þessi stöð getur áorkað fyrir bæinn okkar. „Þetta er jú okkar „veiðikofi“ á Norðurey og við erum væntanlega öll sammála að ferðalangar á Suðurlandi eigi allir sem einn að vita af þessari náttúruperlu í seilingarfjarlægð frá Landeyjahöfn. Ekki síst núna þegar þjónusta og matur í Eyjum er einfaldlega með því allra besta á Íslandi í dag. Ekkert flóknara.“

Sveinn segir ekki skipta minna máli að Laufey verður athvarf fyrir okkur Eyjamenn á faraldsfæti. „Við verðum með hreinustu salerni í heimi ásamt öflugum hraðhleðslustöðvum, sjálfsafgreiðslu-verslun og veitingastað“

Hann segir ekki liggja nákvæmlega fyrir hver aðkoma hagsmunaaðila og fyrirtækja í Eyjum verður að Laufey. „Það er ekki frágengið en frá upphafi hefur verið gert ráð fyrir sér aðstöðu til að kynna Vestmannaeyjar. Ég hef séð fyrir mér samstarf Herjólfs, bæjarins og Ferðamálasamtakanna sem myndu í sameiningu sjá um þá aðstöðu, en það á eftir að skýrast. Við erum a.m.k. að útbúa vettvanginn fyrir það,“  sagði Sveinn að endingu.

Mynd – Húsið er að rísa en þar verða hreinustu salerni í heimi ásamt öflugum hraðhleðslustöðvum, sjálfsafgreiðslu-verslun og veitingastað.