Tónlistarmaðurinn Magnús Kjartan Eyjólfsson mun ekki stýra brekkusöngnum í Herjólfsdal á Þjóðhátíð í ár. Magnús hefur stýrt brekkusöngnum síðan 2021 en segir nú tímabært að stíga til hliðar eftir að hafa ekki fundið sömu ástríðu fyrir verkefninu og áður.

Magnús greinir frá ákvörð sinni í færslu á samfélagsmiðlum þar sem hann lítur yfir farinn veg á tímamótum í lífi sínu. Þar segir hann mikilvægt að staldra við, meta stöðuna og velta fyrir sér hvar áhuginn og krafturinn liggi.

Hann segir tónlistina lengi hafa verið sína helstu ástríðu og að hann hafi náð langt á þeim vettvangi, meðal annars með hljómsveitinni Stuðlabandinu og sem trúbador um land allt.

Magnús þakkar Eyjamönnum, þjóðhátíðargestum og öllum sem hafa fylgt honum í gegnum árin fyrir stuðninginn. Einnig nefnir hann fjölskyldu sína og félaga í Stuðlabandinu, og sérstaklega eiginkonu sína, fyrir ómetanlegan stuðning.

Þrátt fyrir að stíga til hliðar frá brekkusöngnum tekur Magnús fram að hann sé hvergi nærri hættur í tónlist.