Framhaldsskólinn í Vestmannaeyjum hlaut Íslensku menntaverðlaunin 2025 í flokki framúrskarandi iðn- eða verkmenntunar við hátíðlega athöfn á Bessastöðum þann 4. nóvember. Verðlaunin eru veitt árlega til að heiðra framúrskarandi starf í íslensku menntakerfi.

Markmið verðlaunanna er að vekja athygli samfélagsins á metnaðarfullu og vönduðu skóla- og frístundastarfi með börnum og unglingum. Að auki er veitt hvatning til einstaklings, hóps eða samtaka sem stuðlað hafa að menntaumbótum er þykja skara fram úr. Verðlaunin ná til leik-, grunn- og framhaldsskólastigs, sem og til listnáms og félags- og tómstundastarfs, segir í tilkynningu frá mennta- og barnamálaráðuneytinu og frá innviðaráðuneytinu.

Endurspeglar samvinnu skólans, atvinnulífsins og samfélagsins í heild

Í umsögn dómnefndar segir að Framhaldsskólinn í Vestmannaeyjum hafi á undanförnum árum markað sér sterka stöðu á sviði kennslu í málm- og vélstjórnargreinum.

Sérstaða skólans felist í því hvernig tekist hafi að umbreyta hefðbundnu bóklegu námi í verkefnamiðað og atvinnulífstengt ferli, þar sem nemendur vinna raunhæf verkefni sem endurspegla aðstæður í atvinnulífinu.

Í nánu samstarfi við fyrirtæki í sjávarútvegi og iðnaði hefur skólinn byggt upp öflugt námsumhverfi sem tengir saman fræðilega þekkingu og hagnýta færni. Þannig er tryggt að nemendur öðlist dýpri skilning á faggreinum sínum og séu betur undirbúnir fyrir störf á íslenskum vinnumarkaði.

Í litlu samfélagi eins og Vestmannaeyjum, þar sem iðnaður og sjávarútvegur eru lífæð byggðarinnar, hefur þessi nálgun reynst sérstaklega árangursrík. Nám í FÍV endurspeglar samvinnu skólans, atvinnulífsins og samfélagsins í heild. Samvinnu sem hefur orðið fyrirmynd fyrir önnur svæði á landinu.

Sjá einnig: Framhaldsskólinn í Vestmannaeyjum hlýtur Íslensku menntaverðlaunin 2025

Aðrir verðlaunahafar

Auk Framhaldsskólans í Vestmannaeyjum fengu viðurkenningar: Skólahljómsveit Vesturbæjar og Miðbæjar fyrir afar metnaðarfullt og árangursríkt tónlistarstarf. Örvar Rafn Hlíðdal, íþróttakennari við Flóaskóli , fyrir framúrskarandi kennslu í íþróttum og árangur í starfi. Verkefnið Lítil skref á leið til læsis — samstarfsverkefni þeirra Leikskólinn Grænuvellir og Borgarhólsskóli á Húsavík — fyrir nýstárlega nálgun í málörvun og læsi og Háaleitisskóli í Reykjanesbæ fyrir skara fram úr í skólastarfi þar sem fjölmenning og stuðningur við nemendur með erlendan uppruna eru í forgrunni.

Hægt að senda inn tilnefningar til verðlaunanna fyrir árið 2026

Að verðlaununum standa fjöldi mennta- og fræðslustofnana, þar á meðal embætti forseta Íslands, Mennta- og barnamálaráðuneytið, Innviðaráðuneytið, Samtök iðnaðarins, auk háskóla, sveitarfélaga og samtaka sem starfa að menntamálum. Verkefnið er fjármagnað af Mennta- og barnamálaráðuneytinu, Innviðaráðuneytinu og Samtökum iðnaðarins.

Athygli er vakin á því að þegar er hægt að senda inn tilnefningar til verðlaunanna fyrir árið 2026 á www.skólaþróun.is, þar sem einnig má finna nánari upplýsingar um verðlaunahafa og viðurkenningar ársins.