Ég hef ákveðið að bjóða mig fram í 3. – 4. sæti í prófkjöri Sjálfstæðisflokksins í Vestmannaeyjum sem fer fram þann 13. mars nk.

Vestmannaeyjar eru mitt heimili og vil ég leggja mitt af mörkum fyrir samfélagið okkar. Ég tel mikilvægt að í bæjarstjórn sitji fólk sem hefur sterka tengingu við bæjarbúa, þekkir áskoranir þeirra og hefur skýra sýn á framtíðina. Ég vil vinna að áframhaldandi uppbyggingu bæjarins, styrkja grunnþjónustur þess enn frekar, styðja við atvinnulífið og standa vörð um hag íbúa á öllum aldri.

Ég trúi því að góð og heiðarleg stjórnmál byggist á nálægð, trausti og sterkri liðsheild. Af þeim sökum er ég tilbúinn að vera sýnilegur, aðgengilegur og standa með íbúum og fyrirtækjum hér í Eyjum, bæði þegar vel gengur og þegar á móti blæs.

Áhugi minn snýr ekki að því að sækjast í pólitík fyrir pólitískar sakir. Ástæðan er einföld: mig langar að leggja mitt af mörkum, taka ábyrgð og vinna að því að gera gott samfélag enn betra. Ég vil nálgast verkefnin af heilindum, með opnum huga og í góðu samtali og samstarfi við bæjarbúa.

Ég vona að stuðningsmenn Sjálfstæðisflokksins í Eyjum veiti mér traust sitt í prófkjörinu 13. mars og ég hlakka til að eiga gott samtal við ykkur á næstu dögum.

Kjartan Vídó Ólafsson