Víðir Reynisson þingmaður Suðurkjördæmis fyrir Samfylkinguna var fyrir skemmstu á ferð í Vestmannaeyjum. Segja má að Víðir hafi sterka tengingu við byggðamál og eins við öryggi samfélaga þar sem hann starfaði lengi á sviði almannavarna.

Ritstjóri Eyjafrétta settist niður með Víði þegar hann kom til Eyja og ræddi við hann um þingstörfin og þau mál sem brenna á mörgum í Eyjum. Víðir tók sæti á þingi í lok síðasta árs og segir hann að hann kunni vel við sig í nýju starfi.

„Þetta er eðlilega mikið að setja sig inn í og læra á en það gengur vel. Þetta er mjög skemmtilegt og fjölbreytt. Ég sit í tveimur nefndum einnig. Í utanríkismálanefnd og svo ér ég formaður í allsherjar- og menntamálanefnd. Í báðum nefndum eru gríðarlega fjölbreytt mál að koma inn,” segir hann.

Þarna var engin pólitík

Talið barst fljótlega að frumvarpi ríkisstjórnarinnar um hækkun veiðigjalda. Víðir átti fund ásamt oddvitum flestra flokka á þingi með fulltrúum Útvegsbændafélags Vestmannaeyja nýverið. „Við áttum mjög góðan fund með þeim. Þar var farið vel yfir málin og mjög hreinskiptar umræður. Þarna var engin pólitík. Þarna var bara verið að fara yfir hlutina eins og þeir eru og þau voru búin að vinna ansi góðar greiningar á bæði þessum sjávarútvegsfyrirtækjum hér í Eyjum og líka þessum fjölmörgu þjónustufyrirtækjum sem að sjávarútvegurinn skiptir nánast öllu fyrir. Það eru auðvitað skiptar skoðanir með forsendur í þessum hlutum og hversu bratt á að fara. Það var alveg ómetanlegt að fá fram þessi sjónarmið,“ segir hann.

Allt opið núna

Aðspurður hvort hann muni kynna þingflokki Samfylkingarinnar það sem þarna kom fram segir Víðir að hann hafi þegar gert það og einnig fyrir nefndinni sem fjallar um málið. „Svo erum við einnig búin að fá kynningu frá Samtökum sjávarútvegssveitarfélaga um málið og skoða greiningarnar þeirra. Ég held að það sé mikill vilji til þess að setjast yfir málið og fara vel yfir þessi gögn og útreikninga. Stóra málið núna er að skoða alla þessa útreikninga og fara yfir forsendurnar þar á bakvið. Þannig að við sjáum hvort að niðurstaðan í frumvarpinu er rétt eða hvort að við þurfum að breyta henni eitthvað. Það er allt opið núna,“ segir Víðir.

Eins og þetta blasir við núna. Telur þú það líklegra en ekki að frumvarpið taki breytingum á milli umræðna?

Mér finnst ekki ólíklegt að það taki einhverjum breytingum. Megin vinnan fer auðvitað fram í nefndinni, þó að skoðanaskiptin fari fram í þingsalnum. Það er þannig að þeir sem að sitja í nefndinni sem fá öll gögnin og geta kallað eftir frekari gögnum. Það er eins og menn nefndu á þessum fundi þá telja menn að þær forsendur sem reiknaðar eru í uppsjávarfisknum séu alls ekki réttar. Það þarf eðlilega að fara yfir þau sjónarmið og meta hvort að forsendurnar séu réttar eða ekki. Þetta getur skipt mjög miklu máli. Í mínum huga er mikilvægt að fara vel yfir öll þessi gögn og að menn útiloki ekki neitt í þeirri vinnu.

Skiptar skoðanir innan flokkanna

Nú hefur verið rifjað upp í umræðunni hvað flokksmenn og meðal annars Kristrún sagði í kosningabaráttunni um að þetta ætti að gera í skrefum á 10 árum. Eins sagðir þú eftirfarandi á fundi hér upp í Höll í aðdraganda kosninga:

„Engar byltingar í kerfinu, það er stefnan okkar.  Við höfum talað um og rætt það við útgerðirnar að taka samtal um veiðigjöldin. Það má ekki koma niður á rekstrarhæfni útgerðarinnar. Við höfum vilyrði frá útgerðunum um þau séu tilbúin að taka samtalið ef að við komumst í ríkisstjórn. Það byggir á fyrirsjáanlega til langs tíma.“

„Þetta er auðvitað það sem við fórum með inn í samtalið við myndun nýrrar ríkisstjórnar. Svo eru auðvitað bara skiptar skoðanir innan flokkanna hversu hratt á að ganga í þessu. Það er eins og ég segi málið er enn í meðförum þingsins. En við höfum okkar sýn og eins og okkar stefnu en eins og ég sagði á fundinum að þá sáum við þetta gerast á lengri tíma. Það er hins vegar þannig að þegar menn eru í samstarfi í ríkisstjórn að þá þarf stundum að gera málamiðlanir. Við vildum þá bara fá frumvarpið fram og fá öll gögn fram  til að geta þá unnið málið í þingnefndunum og við sjáum svo hver niðurstaðan verður úr því,“ segir Víðir Reynisson.

Nánar verður rætt við Víði í næsta blaði Eyjafrétta. Víðir ætlar að heimsækja Vestmannaeyjar í dag og vera viðstaddur opinn fund um veiðigjöldin í Akóges. Fundurinn hefst klukkan 17.00 og er opinn öllum.