Fátt brennur heitar á íbúum sveitarfélaga sem byggja allt sitt á sjávarútvegi en ákvörðun ríkisstjórnarinnar um að hækka veiðigjöld umtalsvert á bolfisk og uppsjávarfisk.

Næstkomandi fimmtudag standa Eyjafréttir fyrir opnum fundi í Akóges um veiðigjaldafrumvarp ríkisstjórnarinnar. Bæði forsætisráðherra og atvinnuvegaráðherra fengu boð á fundinn en þær hafa báðar tilkynnt um forföll. Einnig fengu allir þingmenn Suðurkjördæmis boð og þegar þessi frétt er skrifuð hafa tveir af þeim tíu þingmönnum boðað komu sína. Það eru þau Víðir Reynisson, oddviti Samfylkingarinnar í kjördæminu og Guðrún Hafsteinsdóttir, formaður Sjálfstæðisflokksins og oddviti í Suðurkjördæmi.

Á fundinum halda erindi Einar Sigurðsson, stjórnarformaður Ísfélags hf. Sigurgeir Brynjar Kristgeirsson, framkvæmdastjóri Vinnslustöðvarinnar. Guðmundur Fertram, stofnandi Kerecis. Páll Magnússon, forseti bæjarstjórnar Vestmannaeyja. Róbert Ragnarsson, sérfræðingur hjá KPMG og Stefán Örn Jónsson, framkvæmdastjóri Skipalyftunnar.

Fundurinn er eins og áður segir í Akóges-salnum og hefst hann klukkan 17.00 á fimmtudag. Bæjarbúar eru hvattir til að mæta til fundarins.