Sigurlínu þökkuð vel unnin störf
Sigurlína kvödd. Einar, Sigurlína og Anna Rós.

„Nýtt starfsfólk hefur komið inn í okkar öfluga starfsmannahóp í Barnaskólanum. Amalía Petra verður í hópi tungumálakennara á unglingastigi, Birgit Ósk Bjartmarz verður umsjónarkennari í 7. bekk, Guðríður Jónsdóttir verður umsjónarkennari í 8. bekk, Jóhanna Alfreðsdóttir verður kennari í stoðþjónustu skólans og svo mun Elínborg Eir fylgja verðandi 5. bekk yfir í Barnaskólann. Við bjóðum þessa kennara velkomna til starfa,“ sagði Einar Gunnarson, annar skólastjóri Grunnskóla Vestmannaeyja þegar hann og Anna Rós Hallgrímsdóttir hinn skólastjórinn settu skólann á mánudaginn.

Fóru þau m.a. yfir breytingar á starfsfólki milli ára og sagði Einar viss tímamót vera í Barnaskólanum þegar hjarta skólans, eins og þau kalla Sigurlínu Sigurjónsdóttur skólaritari er að hætta eftir áratuga starf í skólanum.

„Mig langar að nota þetta tækifæri og þakka Sigurlínu innilega fyrir hennar störf í þágu skólans. Starfsfólk og nemendur munu sakna Línu en sem betur fer höfum við fengið öfluga konu til að taka við af henni. Hún Ingunn Arnórsdóttir hefur verið lærlingur hjá Línu undanfarna mánuði og tekur hún að fullu við starfi skólaritara frá og með þessu hausti.

Tveir skólaliðar hafa bæst í hópinn okkar en það eru þær Dagmar Pálsdóttir og Linne Malon. Þá tók Logi Garðar við sem umsjónarmaður skólahúsnæðis á nýliðnu vori. Við tökum vel á móti þessu starfsfólki!“ sagði Einar.

 Minni breytingar eru á starfsmannahaldi í Hamarsskóla. „En við erum komin með nýjan bókavörð á skólasafnið, Anna Ester Óttarsdóttir hefur tekið við því starfi, við þekkjum hana af Víkinni en bjóðum hana velkomna í nýtt starf. María Rós Friðriksdóttir ákvað að koma aftur til okkar eftir smá hlé og bætist í stuðningsfulltrúahópinn okkar og Arna Björg íþróttakennari hefur einnig snúið til baka úr leyfi og fer á ný í íþróttakennsluna.

Svo bætast alltaf nýir nemendur í hópinn og þá er aldrei eins mikilvægt krakkar að taka vel á móti og styðja vel við þá, því það er alltaf áskorun að byrja á nýjum stað og kynnast nýju fólki,“ sagði Anna Rós.

Nýjustu fréttir

Íþróttir
Þrjú lið frá ÍBV í bikarúrslitum um helgina
Áhugavert
Strangar hæfiskröfur í útboði heilsuræktar
Fréttatilkynning
Ísfélagið áfram einn af aðalstyrktaraðilum KFS
Sjávarútvegur
Útflutningsverðmæti sjávarafurða um 360 milljarðar
Sjávarútvegur
Eyjarnar lönduðu fullfermi í Eyjum um helgina
Umræðan
Vestmannaeyjar – Alveg milljón
Aðsend grein
Kæru Eyjamenn, kæru sjálfstæðismenn
Vinnslustöðin
Drangavík VE dregin til hafnar eftir að veiðarfæri fóru í skrúfu – uppfært
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.