Eyþór Harðarson, útgerðastjóri Ísfélagsins, segir síldveiðar félagsins hafa farið vel af stað á þessu hausti. „Við byrjuðum í síðustu viku á síldveiðum úr íslenska stofninum. Okkar heimildir eru um 13.700 tonn, en við vorum búnir að taka ca. 2.700 tonn fyrir austan í bland við veiðar úr norsk-íslenska stofninum,“ segir hann.

Aðspurður um hvað Ísfélagið eigi mikið eftir af síldarkvóta útskýrir Eyþór að þegar veiðarnar hófust vestur af landinu hafi um 11.000 tonn verið óveidd. „Heimaey og Sigurður stunda veiðarnar og hafa landað sitt hvorum túrnum upp á 1.200 tonn hvor. Þannig að við eigum 9.000 tonn eftir á þessari vertíð sem við vonumst til að klára fyrir jól ef vel gengur.“

Veiðarnar fara nú fram vestur úr Faxaflóa og segir Eyþór tímann á miðin hæfilegan. „Síldin er að veiðast vestur úr Faxaflóa og ekki nema 10–12 tímar á veiðsvæðið eins og þetta hefur verið,“ segir hann.

Spurður um meðafla í veiðunum segir Eyþór að það sé lítið um annað en síld í veiðafærunum. „Það hefur verið eitthvað um spærling í meðafla en að öðru leyti er þetta bara hrein síld,“ segir hann að lokum.