Vindurinn neær nú orðið stormstyrk á Stórhöfða. Klukkan 10 í morgun mældust þar 23 m/s og sló mest upp í 30 m/s í hviðum. Gul viðvörun er  bæði á Suðurlandi og á Suðausturlandi. Á Suðurlandi tekur viðvörunin gildi klukkan 11.00 og gildir til klukkan 20.00 í kvöld. Herjólfur sigldi til Þorlákshafnar í morgun en ölduhæðin í Landeyjahöfn fór yfir 4 metra. Í nýrri tilkynningu frá skipafélaginu segir að Herjólfur sigli til Þorlákshafnar seinnipartinn í dag þar sem ófært er til Landeyjahafnar vegna aðstæðna í höfninni.

Brottför frá Vestmannaeyjum kl. 16:00 (Áður ferð kl. 17:00). Brottför frá Þorlákshöfn kl. 19:45 (Áður ferð kl. 20:45). Ferðir kl. 18:15, 19:30, 22:00,23:15 falla niður.

Leifar fellibylsins Erin

Í hugleiðingum veðurfræðings á Veðurstofu Íslands – sem skrifuð er fyrir klukkan 7 í morgun segir: Seinnipart síðustu viku var fellibylurinn Erin að þokast til norðausturs, tiltölulega langt úti fyrir austurströnd Bandaríkjanna. Náði hún um tíma styrkleikanum fimm, sem er efsta styrkleikastig fellibylja, en missti smám saman kraftinn eftir því sem hún barst lengra til norðurs yfir kaldari sjó. Um helgina var hún komin á svæðið suðaustur af Nýfundnalandi og gekk þá hlýtt hitabeltisloftið í fellibylnum í veg fyrir svalara loft úr norðri og tók þar með þátt í hefðbundinni lægðadýpkun á þessum slóðum, sem við þekkjum svo vel og fáum oft að kenna á.

Nú þegar þetta er skrifað er lægðin (leifar fellibylsins Erin) stödd 450 km S af Vestmannaeyjum og þrýstingur í miðju hennar 962 mb, sem er mjög djúpt fyrir árstímann. Það mun enda blása hressilega af austri á landinu í dag. Allhvass eða hvass vindur sunnanlands, hvassast allra syðst. Víða strekkingur í öðrum landshlutum. Súld og rigning verður viðloðandi um landið sunnan- og austanvert. Norðan- og vestanlands verður hins vegar lítil úrkoma og jafnframt nokkuð hlýtt, kringum 20 stig þegar best lætur, enda loftið yfir landinu hlýtt og að hluta til ættað innan úr fellibylnum.

Á morgun gera spár ráð fyrir að títtnefnd lægð verði áfram fyrir sunnan landið, en grynnist hratt og vindur gefur því eftir. Súld ennþá á suðaustan- og austanverðu landinu. Í öðrum landshlutum skýjað með köflum með möguleika á smávegis skúrum hér og þar og áfram hlýtt.