Nú eru síðustu forvöð að sjá hina áhugaverðu samsýningu innlendra og erlendra listamanna í Einarsstofu og Sagnheimum í Safnahúsinu, þar sem sýningin verður tekin niður eftir helgi.

Af því tilefni munu Vala Pálsdóttir, sýningarstjóri og Þorgerður Ólafsdóttir, myndlistamaður leiða gesti um sýninguna í dag sunnudaginn 22. október kl. 14:30. Að lokinni leiðsögn verður boðið upp á kaffi og spjall.

Á sýningunni er í fyrsta sinn dregið saman safn verka, bæði nýrra og eldri um Eldfell, eftir um tuttugu íslenska og erlenda listamenn, rithöfunda og fræðimenn sem hafa rannsakað Eldfell.

Sýningin var opnuð 9. september s.l. og hefur fengið góðar viðtökur.

“Við hvetjum alla til að nýta tækifærið og koma og sjá sýninguna, bæði þá sem hafa komið áður sem og hina sem ekki hafa gefið sér tíma til þessa,” segir í tilkynningu frá Sagnheimum.