Tímamót í sögu UMFÍ
Aðild að UMFÍ var samþykkt á ársþingi ÍBV í gær :: Með aðildinni eru öll íþróttafélög landsins í fyrsta sinn komin í raðir UMFÍ
IBV UMFI 2025 Ads
Stjórn ÍBV með þeim Auði Ingu Þorsteinsdóttur, framkvæmdastjóra UMFÍ, Jóhanni Steinari Ingimundarsyni, formanni UMFÍ, og Valdimari Leó Friðrikssyni, sem var fulltrúi ÍSÍ á þingi ÍBV. Mynd/aðsend.

„Allar hendur voru uppréttar og tillagan var samþykkt samhljóða,“ segir Gunnar Páll Hálfdánsson, formaður Íþróttabandalags Vestmannaeyja (ÍBV). Tímamót voru á ársþingi bandalagsins í gær þegar samþykkt var samhljóða umsókn ÍBV um aðild að UMFÍ. Með samþykktinni lýkur vegferð sem hófst fyrir meira en aldarfjórðungi enda eru nú öll íþróttafélög landsins orðin aðildarfélög UMFÍ í gegnum íþróttahéruð landsins, það er héraðssambönd, íþróttabandalög og ungmennasambönd um allt land.

„Þetta eru miklar framfarir fyrir stjórnskipulag íþrótta- og ungmennafélagshreyfingarinnar, enda eru nú væntingar um aukið samstarf og meiri slagkraft orðnar að veruleika. Íþrótta- og ungmennafélagshreyfingin er mun kröftugri en áður þegar allt fólk innan íþróttahreyfingarinnar er með,“ segir Jóhann Steinar Ingimundarson, formaður UMFÍ.

Áralangt ferli

Sex ár eru síðan aðildarumsóknir þriggja íþróttabandalaga að UMFÍ voru samþykktar. Það gerðist á sambandsþingi UMFÍ árið 2019 þegar Íþróttabandalag Akraness (ÍA), Íþróttabandalag Akureyrar (ÍBA) og Íþróttabandalag Reykjavíkur (ÍBR) urðu sambandsaðilar UMFÍ. Í kjölfarið bættust við Íþróttabandalag Hafnarfjarðar (ÍBH), Íþróttabandalag Suðurnesja (ÍS) og Íþróttabandalag Reykjanesbæjar (ÍRB). Við aðild bandalaganna var úthlutun lottóreglna breytt á sama tíma í jafnræðisskyni.

Gunnar Páll segir aðildarumsókn ÍBV að UMFÍ hluta af markvissri vinnu stjórnar bandalagsins síðastliðin þrjú ár, sem miði að því að auka samkennd og sýnileika aðildarfélaganna og styrkja sambandið með samstarfi.

„Hér í Eyjum eru allir spenntir fyrir samstarfinu. Það gekk einfaldlega ekki upp að standa utan við hreyfinguna og því sóttum við um aðild,“ segir hann og horfir til þess að ÍBV og aðildarfélögin hafi möguleika á því að styrkja í kjölfarið og sækja betur fram á víðum grundvelli, svo sem með bættum stuðningi, fræðslu og aðgengi að ýmsum þáttum.

Gunnar Páll er borinn og barnfæddur á Flateyri við Önundarfjörð og þekkir hann vel til ungmennafélagshreyfingarinnar: „Á Flateyri var rík ungmennafélagsstemning. Ungmennafélagsandinn felst einmitt í því að vera með og taka þátt og það er undirtóninn í allri okkar vinnu,“ segir hann.

Um UMFÍ og ÍBV

Með aðild ÍBV eru öll 25 íþróttahéruð orðnir sambandsaðilar og aðildarfélögin tæplega 500 félög um allt land. Fyrir þingið voru aðildarfélög ÍBV tólf talsins. Tvö bættust við á þinginu. Fyrir voru félögin ÍBV íþróttafélag, Golfklúbbur Vestmannaeyja, Sundfélag ÍBV, Fimleikafélagið Rán, Íþróttafélagið Ægir, Badmintonfélag Vestmannaeyja, Blakfélag ÍBV, Karatefélag Vestmannaeyja, Körfuknattleiksfélag ÍBV, Framherjar, Smástund og Skotfélag Vestmannaeyja. Þau sem bættust við eru Pílufélag Vestmannaeyja og Handboltafélag Heimaeyjar (HBH).

Nýjustu fréttir

Aðsend grein
Borgarlína eða lífæð? Við erum að velja vitlaust
Skólamál
Tæplega hundrað nýta gjaldfrjálsa leikskólatíma
Fréttir
Rafmagnslaust: Stór truflun í kerfinu – uppfært
Fréttir
Annríki hjá Björgunarfélagi Vestmannaeyja í fárviðri
Úr blaði Eyjafrétta
Hjalti læknir og Vera Björk Eyjafólk ársins 2025
Fréttir
Stormur á Stórhöfða
Aðsend grein
Sterkt samfélag byggir á trausti og samvinnu
Aðsend grein
Mikilvægasta skipið
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.