Sunnudaginn 8. júní nk. kl. 17:00 heldur Kór Vídalínskirkju úr Garðabæ tónleika í Landakirkju í Vestmannaeyjum.  Með á tónleikunum verður Kór Landakirkju og munu kórarnir syngja saman nokkur lög undir stjórn kórstjóranna, Jóhanns Baldvinssonar og Kitty Kovács. 

Á efnisskránni verða þekkt íslensk kórlög, m.a. lög úr ferð kórsins til Ungverjalands síðastliðið sumar, en einnig nýrri lög m.a. annars eftir einn kórfélaga. Má þar nefna m.a. Smávinir fagrir eftir Atla Heimi Sveinsson, Kvöldbæn eftir Björgvin Guðmundsson og Vorið kemur eftir Valgeir Guðjónsson. 

Fyrr í þessum mánuði hélt Kór Vídalínskirkju metnaðarfulla og vel sótta hátíðartónleika í Vídalínskirkju.  Tilefnið þetta vorið var sérstakt fyrir þær sakir að nú eru 30 ár liðin frá vígslu Vídalínskirkju í Garðabæ.  Með á tónleikunum var 9 manna strengjasveit og var organisti og kórstjóri kórsins, Jóhann Baldvinsson búinn að útsetja nokkur laganna fyrir sveitina.  Þóttust tónleikarnir takast afar vel og hver veit, vegna áskorana að þeir verði endurteknir við fyrsta tækifæri. 

Kór Vídalínskirkju fór í söngferðalag á síðasta ári, 2024 til Búdapest í Ungverjalandi.  Sú ferð var afar vel heppnuð og ógleymanleg fyrir margra hluta sakir.  Fararstjóri í ferðinni var fyrrum kórstjóri kórsins, Ferenc Utassy nú ræðismaður okkar Íslendinga í Ungverjalandi og ferðaþjónustubóndi.  Kórinn kom fram tvisvar sinnum opinberlega á tónleikum í þessari ferð.  Þess má líka til gamans geta að í ferðinni voru nokkrir kórfélagar með í för sem fóru til Ungverjalands í kórferð með kórnum fyrir 30 árum.  Slíkt hlýtur að teljast einsdæmi. 

Kór Vídalínskirkju hefur gjarnan ferðast innanlands og fylgt eftir „vorinu“ og vortónleikum kórsins.  Mikil tilhlökkun er meðal kórfélaga að fá að koma og syngja fyrir Eyjamenn! 

Aðgangur að tónleikunum er ókeypis og öll eru velkomin, segir í tilkynningu frá kórnum.