„Ég hef ekki fengið neitt nema jákvæð viðbrögð og vonandi tekst okkur að standast væntingar með framhaldið,“ sagði Guðbjartur Ellertsson framkvæmdastjóri Herjólfs ohf í samtali við Eyjafréttir. Núna er unnið að því að koma nýja skipinu í rekstur en verkefnin eru nokkur áður en það gerist.

„Við erum núna að vinna í að gera það sem þarf til að koma Herjólfi í rekstur. Hluti af því snýr að leyfismálum það er farþegaleyfi, haffæri fyrir siglingaleiðirnar, uppfylla öll skilyrði fyrir öryggimál og gera skipið rekstrarhæft. Jafnframt er verið að undirbúa ferjuna til að takast á við alla okkar flutninga sem og að gera kaffiteríu og annað sem fylgir farþegaflutningum klárt,“ sagði Guðbjartur.

Spenntir að hefja starfsemi á nýju ferjunni
Það þarf að sigla nokkuð ört á ekjubrýrnar og máta ferjuna á þær og einnig þarf að gera lagfæringu á ekjubrúnni í Vestmannaeyjum. „Nýja ferjan er nokkuð frábrugðin þeirri eldri en mikilvægt er að aðkoma að bryggjum geti gegnið vel fyrir sig sem og lestun og losun.  Við eigum eftir að reyna svolítið á þetta og eins þarf að setja upp nýtt vinnu- og verkskipulag þar sem umhverfið er tölverð annað en á eldri Herjólfi.  Þetta mun taka einhvern tíma en við keppumst við að stytta þennan tíma eins og kostur er enda allir spenntir fyrir því að hefja starfsemi á nýju ferjunni,“ sagði Guðbjartur.

Guðbjartur segir að það þurfi að sigla á allar hafnir og láta svolítið reyna á sjóhæfni nýju ferjunnar. „Einfaldasti hlutinn er að sigla á milli hafna, mestur tími fer í að ná færni í að leggjast að ekjubrúnum. En þessi hlutir koma fljótt enda tíðar komur og brottfarir í áæltun okkar eða 14 á dag í heildina.“

Í eldri Herjólfi var sérstakt rými á bíladekki sem gékk undir nafninu dýraríkið og var ætlað undir hunda í hundabúrum eða önnur dýr. Ekkert svoleiðis athvarf er í nýju ferjunni, hvað á fólk sem þarf að ferðast með dýrin sín að gera? „Lengi vel átti rekstraraðilinn búr sem var til afnota fyrir eigendur hunda en að vel athuguðu máli og eftir samtöl við dýralækna þótti það ekki skynsamlegt þar sem hundar eru þefnæm dýr og skynja margt í umhverfi sínu. Það eru því meiri líkur en minni að hundarnir stressist við að fara í búr sem aðrir hundar hafa verið í. Best þótti að hundar væru í sínum eigin búrum og í umhverfi sem þeir þekkja best. Ef þeir koma með bílum eru þeir betri en allt annað. Í nýja Herjólfi er hannað rými sem er í farþegarými en það á eftir að meta hvort það sé skynsamlegt að nýta það, en mikilvægt er að skapa ekki aðstæður sem geta stressað hunda.  Rýmið er lítið, þröngt og gluggaslaust.  Við munum, ef það reynist ekki skynsamlegt að nýta það, finna aðra aðstöðu sem uppfyllir betri skilyrði. Jafnvel þó siglingaleiðin sé stutt þá tekur það hunda tölverðan tíma að venjast flutningum hvort heldur sem er í lofti eða á sjó, því verður að taka mið af því hvað er best er að gera til að tryggja velferð þeirra,“ sagði Guðbjartur.