Gunnar Heiðar Þorvaldsson lét að sér kveða í æfingaleik í gær með þýska liðinu Hannover sem tók á móti spænska meistaraliðinu Real Madrid í Þýskalandi. Landsliðsframherjinn kom inná sem varamaður í síðari hálfleik þegar þýska liðið var marki undir og skoraði Gunnar annað mark leiksins á 63. mínútu.

Vestmannaeyingurinn hafði aðeins verið inni á vellinum í eina mínútu áður en hann hafði skorað. Það voru tæplega 48.000 áhorfendur sem mættu á leikinn á AWD-Arena í Hannover. Þjóðverjinn Bernd Schüster er þjálfari Real Madrid og er hann með lið sitt í æfingaferð í heimalandi sínu. Lið Real Madrid var þannig skipað: Casillas – Cicinho (62. Pepe), Ramos, Cannavaro, Torres – de la Red (62. Granero), Diarra, Balboa, Bueno (46. Guti) – Raul (62. Saviola), Higuain.